Astelehenero biltzeari ekingo diote gaur berriro, pentsiodunek. Plazan 12:00etan jarri dute hitzordua, beste behin. Horrekin batera, «urtarrilaren 30erako Euskal Herriko gziarte-mugimendu eta sindikatu gehienek deitutako greba orokorra babestea erabaki» dutela jakinarazi dute.
«Oraindik ez ditugu lortu gutxieneko helburuak»
Astelehenero «13.000 pentsiodunek ehun bat herritako plazak betetzen» badituzte ere, bai Araban, Bizkaian, Gipuzkoan edota Nafarroan, «gutxieneko helburuak oraindik ez» dituztela lortu adierazi dute. «2018ko ekainetik aurrera zerbait egin zezaketenek, Estatuko gobernuak, ez du egin, ez da egiten ari, eta ez dugu nahiko bermerik hurrengo hilabeteetan gobernu berriarekin egingo dutela ziurtatzeko; hauteskunde-prozesuetako promesak haizeak eraman ditzake, eta ez dugu beste bi urteren zain egon nahi».
Diote «esperoan egoteak pobretu» egiten dituela, eta «pentsiodunek gero eta baliabide gutxiago eta behar gero eta haundiagoak» dituztela. Era berean, «aldarrikapenak presazkoak eta bidezkoak» direla azpimarratu dute, eta zein diren gogorarazi dute: «2011 eta 2013ko pentsio-erreformen alderdi erregresiboak indargabetzea; pentsioen balio-haunditze automatikoa, bizitzaren kostuaren igoeraren arabera gutxienez; pentsioen sistema publikoa eta haren finantzaketa bermatzea, beharrezkoa bada, Estatuaren aurrekontuekin, eta gizarte-kotizazioak nabarmen hobetzea, enplegu duina bermatuz, 2010 eta 2012ko lan-erreformak indargabetuz eta 1.200 euroko Lanbide arteko Gutxieneko Soldata ezarriz; 1.080 euroko gutxieneko pentsioa, Europako Gutun Sozialaren eskakizunetara hurbiltzeko; lansari eta pentsioen arteko genero-aldea ezabatzea, alarguntza-pentsioaren oinarri arautzailearen %100erainoko igoera barne; 40 urtez kotizatutako erretiro aurreratuen koefiziente murriztaileak indargabetzea, Kongresuan onartutako PNLren irizpideen arabera; eta adinekoentzako eta pentsiodunentzako bizi-baldintza duinak bermatzea, mendekotasunaren arretarako zerbitzu unibertsalen sare publikoa barne hartzen dutenak».
«Pentsio publikoak, ongizate estatuaren oinarri»
Bestalde, gogorarazi dute «pentsioak, soldatak eta fiskalitatea direla aberastasuna modu bidezkoan banatzeko tresnarik egokienak», eta hain zuzen, «pentsio publikoak izan direla eta direla ongizate-estatuaren oinarrietako bat, eta hala izaten jarraitu behar» dutela.
Horregatik, «horiek defendatzea guztioi dagokigula» azpimarratu dute; «ez da pentsiodunen kontua soilik». Beraz, urtarrilaren 30ean herri eta hirietako kaleak betetzeko dei egin dute, mobilizazioaren eta egun horretarako deitutako greba orokorraren alde. «Helburuak lortzeko bermea mobilizazioa areagotzea da».
Era berean, atxikipenak eta iradokizunak jasotzeko, posta elektronikoa jarri dute martxan: 2020mpeh@gmail.com.