Batzuek bukatu, eta besteek hasi. Euskal Ligako aurreneko itzuliko azkeneko jardunaldia jokatuko dute Hernaniko mutil nagusiek, asteburu honetan; eta aldiz, estreinakoa izango dute Gipuzkoako Txapelketan, neska nagusiek.
Iruñean ariko dira mutilak, bihar goizeko 11:30etan, Navarmutilak taldearen kontra. Hiru porrota segidan jaso ondoren, garaipen batekin itxi zuten urtea hernaniarrek; eta halaxe hasi nahi dute berria ere, sailkapenean nabarmen beherago dagoen talde baten kontra.
Neskak, berriz, Urretxun ariko dira gaur, 14:00etan, Goierri S taldearen kontra. Irekiera Txapelketa porrotarik jaso gabe bukatu ondoren, Gipuzkoako Txapelketa hasiko dute orain. Zortzi talde ariko dira, Irekiera Txapelketako berberak, eta zazpi partidu izango ditu bakoitzak.