Francisco 'Paco' Goya eta bere taldeak 14 urte daramatzate lehendakari eta zuzendaritza batzorde bezala Goiz Eguzki elkartean eta «erreleboa behar dugu» dio Goyak Kronikari eskainitako elkarrizketan. «Zahartu gara eta oso nekatuta gaude. Urte batzuk daramatzagu erreleboa eskatzen urtero egiten ditugun ohiko batzarretan, baina ez da inor aurkezten. Iritsi da momentu bat ezin duguna jarraitu».
Egoeraren berri eman zaie bazkideei idatzi baten bidez eta etzi egingo da ez ohiko batzarra. «Elkartearen egunerokotasuna eramateko jende berririk ez dago. Hori da dena».
Jendeak galdetzen duena da zer gertatuko den Goiz Eguzkirekin zuzendaritza berririk ez baldin badago?. 14 urtetan lehendakari izan den Goyak argi du. «Zuzendaritzarik ez badago ezin da elkarterik egon. Goiz Eguzkiren izatea edo existentzi bera daude jokoan. Horrek esan nahi duenarekin» eta horrek ematen dio min gehien Goyari.
Goiz Eguzkirekin zer gertatuko den Udalak eta Ongizateak erabakiko luke. «Guk Udalaren eta Gizarte Ongizate departamenduaren babespean gaude».
Etziko ez ohiko batzarra erabiliko da bazkidei gogoarazteko elkartearen egoera eta zer gertatuko den zuzendaritzarik ez balego. Otsailean, urteroko ohiko batzarrean, emango da hurrengo pausoa, eman beharrekoa gertatzen denaren arabera.
Paco Goya eta bere plantxak utzi egingo dute jarduna, baina beste norbaitek hartuko balu laguntzeko prest egongo lirateke. «Noski zuzendaritza berria ez genuke albo batera utziko. Aurreneko pauso horietan lagunduko genuke martxan jartzeko eta eguneroko jarduna nolakoa den erakusteko».
Hala ere, gauzak argi esatearren Goyak ilun ikusten du etorkizuna. «Kalean ibiltzen naiz eta entzuten ditut gauzak eta esan beharra daukat momentu honetan ez dut zuzendaritza berri baten berririk entzun. Egunero nago hemen, baina ez da ezerrez entzuten».
Kudeatzailerik gabe ez dago elkarterik eta dena galduko litzateke
Udala ez litzateke kargu egingo eta Goyak dio bazkideetatik etorri behar dela irtenbidea. «Elkartea desegin egingo litzateke eta bukatu da. Gero Udalak ikusiko luke jubilatu etxearekin eta egoitzarekin zer egin, baina elkartea bera ez litzateke existituko».
1.500 bazkide ditu Goiz Eguzkik eta horiek denak galduko lituzke. «Ez baldin badago kudeatzailerik, ez legoke elkarterik, ez bazkiderik, ez da kuotarik ordaindu beharko, ibilaldiak bukatuko dira, pedikura zerbitzurik ez da egongo, egiten diren ekitaldi guztiak bertan behera geratuko dira, hamaiketakoak-lunch-ak, jokoak, maiatzaren 1eko eguna, San Joanetakoa, Santo Tomaseko eguna, hitzaldiak, loteria... elkartea bera ere itxiko litzateke seguruenik».
47 urte bete ditu eta «azken 14 urtetan asko aldatu da»
14 urtetan talde bera egon da eta Paco Goyak egiten duen balantzea oso positiboa da. «Asko aldatu da urte hauetan. Nire izaera da gauzak egitearena eta urte hauetan gauza asko egin dira elkartean. Elkarteko oraingo sarrera berria egin dugu urte hauetan, lehen ez zegoen areto nagusirik, abesbatza bera ere ez zegoen». Abesbatzarekin zer geratuko den ez daki, baina «lekua eta elkartaren dirulaguntza behar ditu nahitanahiez. Gure laguntza hori bukatuko da. Latinez esaten den bezala Consummatum est».
47 urte bete ditu Goiz Eguzki elkarteak. «Azken finean adinekoentzako txokoa da arratsaldea edo goiza pasatzeko. Batez ere arratsaldea. Adineko askok hemen egiten dute bizitza neguan; Bertara etorri lau-sei gailetekin, kafesnea hartu, goxatu eta gero etxean zuzenean ohera sartu, gehiago baliabide gutxi dituen jendea dagoenean. Hemen bere koadrila txikia egiten dute, afaldu beharrik ez dute, baina hori dena Consummatum est. Arazoa larria da, Goiz Eguzki adineko askorentzat babeslekua baita eta hori bukatu egingo da».
Etzi egoeraren berri azalduko dute Alkateak eta Ongizateko Gerenteak
Arratsaldeko 17:30etara daude deituak bazkideak ez ohiko batzarrera eta bertan kontzientziak mugitu nahi dira aurrerapausoak emateko.
Hernaniko Goiz Eguzki Jubilatuen etxea egoera estuan aurkitzen da ez baita Zuzendaritza Batzorderako talde berririk aurkeztu. Horrek bere etorkizuna zalantzan jarri du eta horri irteera emateko etzi, astelehenean, urtarrilaren 13an, ez ohiko batzarrera daude deituak bazkide guztiak. Arratsaldeko 17:30etan antolatu da batzar berezi hori eta bertan egongo dira, besteak beste, Xabier Lertxundi alkatea, Ongizateko gerentea den Joseleon Etxart eta gaur egungo zuzendaritza batzordea. «Jubilatuen etxea desagertzeko arriskua dago, kudeaketa bere gain hartzeko bazkide faltagatik. Inork ez du erantzunkizun hori hartu nahi» dio zuzendaritzak.
14 urte eta gero dimisioa aurkeztu zuen Zuzendaritzak
Gogoratu behar da gaur egungo Zuzendaritza Batzordeak pasa den urriaren 21ean dimisioa aurkeztu zuela, baita Francisco Goya lehendakariarena ere, 14 urte eta gero. Bazkideek otsailean egingo den bazkideen batzarrean baiezkoa eman behar diote zuzendaritza berriaren osaketari, baina ez da talderik oraindik aurkeztu. Otsaileko batzarra arte oraingo zuzendaritzak jarraitzen du eta egun horretakoa izango da azken egitekoa, batzarra zuzentzea.
Hala ere, «bazkideak jabetu behar dira lehendakari eta zuzendaritza batzar berria aukeratzen ez bada, Goiz Eguzki jubilatuen elkartea zuzendaritza organorik gabe geratuko dela, eta elkartea likidatu egingo dela, eta, ondorioz erregistroan baja emango zaiola» diote gaur egungo Batzordekideek.
Etziko ez ohiko batzarrean, Alkateak eta Gizarte Ongizateko gerenteak horren berri eta elkartea nola geratuko den azalduko dute.