Hala moduzko hasiera eman diote urteari CD Hernaniko futbol taldeek. Asteburuan jokatu dituzte hainbat partidu, eta horien artean, gorengo mailako bi taldeek galdu egin dute.
Euskal Ligan, neskek, 2 eta 0 galdu zuten Anaitasunaren aurrean. Ohorezko Erregional mailan ere, mutilek, 1 eta 0 galdu zuten Bergararen aurrean. Emakumezkoen Ohorezko Erregional maila izan da garaipena lortu duenetako bat: 3-0 gailendu da Urnietaren aurrean. Gainontzean, mutiletan, erregional preferenteek 1-3 galdu zuten Ostadarren aurka; ohorezko jubenilek, launa berdindu, Beti Gazteren aurrean; ohorezko kadeteek, 6-0 irabazi Ostadarri; 1go mailako infantilek 5-1 galdu Intxaurreren aurka; eta ohorezko infantilek ere galdu, 1-2, Antiguokoren kontra. Nesken ohorezko infantilek ere galdu egin zuten 0-2, Eibarren kontra.
Reala txapeldun, Joxean Arabiotorre txapelketan
Bestalde, urtea bukatzeko emakumezkoen VI. Joxean Arabiotorre Txapelketa jokatu zen abenduaren 31n. Hiru talde aritu ziren elkarren kontra. Hernanik zerona berdindu zuen Tolosaren aurka; Tolosa eta Realak ere berdinketa izan zuten, 1-1; eta Hernani eta Realaren artean, azken hau izan zen txapeldun 0-2. Beraz, Reala izan zen txapeldun, Tolosa eta Hernani atzetik geratuta.