Kaxkoko dendak: lehen eta orain lehiaketa pasa den abenduaren 11n jarri zen martxan eta bihar iritsiko da amaierara. Aurten Gabonetako zuhaitzean Kaxkoko dendak omendu dituzte liburutegian. Espazio faltagatik, Andre Kale eta Kale Nagusiko denda batzuk bakarrik sartu ahal izan dituzten arren, helburua Hernaniko komertzio guztien lana goraipatzea izan da, garai zail hauetan.
Gainera, iaz bezala, zuhaitzean agertzen diren argazkiekin lehiaketa bat ere antolatu dute, zazpi galdera prestatuz.
Hiru sari eta bakoitzean 60 euroko bono bana
Liburutegian ikusi daiteke oraindik zuhaitza eta lehiaketan parte hartu. Ordu batzuk geratzen dira. Galdera guztiak ongi asmatzen dituztenen artean zozketa egingo da.
Hiru sari daude guztira, 60 euroko bono bana, Elkar (Hernani), Gaueko eta Sebas dendetan erabiltzeko.
'Axpi'rekin azken tailer eguna
Bestetik, Hernaniko Udal Liburutegian antolatu den komiki tailerra azken egunera iritsi da gaur. 11:00etan. Ainara Azpiazu Axpi komikilari eta marrazkilariak eskainiko du azken tailerra. Bi egunetan egon da aurretik; astelehen eta asteartean eta parte hartzeko, aurrez eman behar zen izena, doan.