Seigarren urtez jarraian hernaniarrek bere solidaritatea erakutsi zuten urte zahar egunean ospatu eta jokatzen den San Silbestrean. Wukroren alde adin guztietako ehundaka hernaniar eta ez hernaniar bildu ziren urtea korrika amaitzeko.
Zazpigarren edizioa bete zuten lasterkariek giro ezin hobean, nahiz eta aurten mozorro gutxi xamar ikusi aukeran. Mozorrotuen artean saria Tenistak eraman zuen.
Eguraldi paregabearekin, 18:00etan abiatu ziren herenegun, urte zahar egunez, Wukroren aldeko San Silbestrea osatzeko gogoz korrikalariak.
Plazatik abiatu, eta Lizeaga aldera joan ziren korrikalariak tropelean. Gutxianaka distantziak sortzen hasi ziren, eta bukaerarako, bakar bakarrik, garaile gisa agertu zen Peru Ruiz, herriko plazan. Aurreneko gizonezkoa izan zen bera; bigarren iritsi zen Vicent Pastor, pasa den urtean bezala, eta hirugarren beste Pastor bat, Xabat hain zuzen. Arraulari gaztea bakarrik iritsi zen postu horretan.
Emakumezkoen artean, Maitane Guerrero izan zen azkarrena; bigarren izan zen Ainara Errazkin, eta hirugarren, June Montero.
Amaieran saskia zozketatu zen partehartzaile guztien artean eta irabazlea Julen berrondo izan zen.
Esan, nagusien lasterketa hasi aurretik gaztetxoenak ere aritu zirela korrika. Ordu erdi lehenago atera ziren txikienak eta Andrekale eta Kale Nagusien artean 300 metro osatu zituzten. Ondoren 9-12 urtekoak Zinkoeneraino jaitsi eta berriz Plazara igo ziren 800 metro osatuz. Urtea amitzeko modu osasuntsu eta solidarioa.
- SAILKAPENAK
Emakumezkoak
1. Maitane Guerrero Moriana
2. Ainara Errazkin Sagarzazu
3. June Montero Sagarzazu
Gizonezkoak
1. Peru Ruiz Irisarri
2. Vicent Pastor Sanchís
3. Xabat Pastor Gurrutxaga
Zozketako saskiaren irabazlea
Julen Berrondo 186 dortsala
Mozorro onenaren saria
Tenistak