Urtea korrika amaitzea ohitura bihurtu da Munduko herri askotan eta Hernanin ere San Silbestrea antolatzen hasi ziren duela urte batzuk. Gainera Wukroren aldekoa izaten da eta gaur, 17:30etan hasiko da. Aurten eguraldia lagun izango da.
Gaztetxoak izango dira korrika egiten aurrenekoak. Hasteko, 8 urte artekoak abiatuko dira, 300 metroko ibilbidea osatzeko. Ondoren, 17:45etan, 9-13 urte bitartekoen txanda izango da, eta 800 metro egingo dituzte haiek. Eta azkenik, 18:00etan abiatuko da lasterketa nagusia, 14 urtetik gorakoena. Aurreko urteetan bezala, 4 kilometroko zirkuitua osatuko dute: Plazatik Lizeaga aldera abiatu, auzoari buelta eman, Atzietatik Zinkoeneara jaitsi eta handik Floridara, Montebideo eta Karmelo Labakatik Latsunbeberrira igo, auzoari buelta, eta Urbieta kaletik Plaza Berrira azalduta, Kale Nagusian gora bukatu, ikusleek osatuko duten pasillotik igarota, Plazaraino.
Korrikalariek, Plazan jasoko dituzte dortsalak eta opariak, probaren aurretik. Eta oraindik apuntatu ez direnek, bertan izango dute azkeneko aukera; 11 euro izango dira.
Konpresa bilketa 'Hegoak Etiopian' elkarteak
Hilerokoagatik eskolara joan ezin duten nesken egoera aldatzea eta emakumeen ahalduntzea helburu duen Hegoak Etiopian taldearekin elkarlanean, konpresa bilketa ere egingo da 16:00etatik aurrera Plazan.