Txapelketaz txapelketa eta finalez final, lanpetuta dabiltza egun hauetan, Hernaniko palistak. Sakanako Torneoaren finaletan izan ziren larunbatean, Etxarri-Aranatzen, Ekhine Balerdi eta Amaia Irazustabarrena; eta aurrenekoak ekarri zuen txapela Hernanira. Bigarren mailako finala irabazi zuen Balerdik, Paula Gorostiagarekin batera, Olatz Zulaika eta Naroa Otxoaren kontra (30-27).
Irazustabarrenak, aldiz, ezin izan zuen lehenengo mailako finalean. Leire Azanzarekin bikotea osatuta, galdu egin zuen, Uxue Murillo eta Irati Igoaren kontrakoa (20-30).
Atzo iluntzean, beste txapelketa batean ere aritu zen Irazustabarrena bera, Getxon, Nesken I. Gabon Kinielan. Amaia Araiztegirekin jokatu zuen, paleta larruz; eta aurrean izan zituzten Isasmendi eta Murga, eta Flaviano eta Mendizabal. Jaialdia ETBk grabatu zuen, eta bihar eskainiko du, eguerdiko 12:00etan, ETB4 katean.
Hori baino lehen, ordea, Gabonetako Txapelketaren finala jokatuko du Garazi Urdangarin hernaniarrak, gaur arratsaldean, Ataunen. Nahia Eizmendi aiarrarekin ariko da bera.
Eta bolada ona borobiltzeko, Irazustabarrenak eta Araiztegik jokatuko dute Bizkaia Torneoaren finala, larunbatean.