Arratsalde haundia bizitu zuen Galarretak, atzokoan. Sekulako giroa izan zuen frontoiak, bete-beteta, Binakako Txapelketaren finalarekin. Eta horretan lagundu zuten lau protagonista nagusiek, ikuskizun ederra eskaini baitzuten, partidu bizi-bizia jokatuta: Urrizak eta Larrañagak jantzi zuten txapela azkenean, Matxin III eta Barrenetxea IVri irabazita (37-40).
Nahiko hotz ekin zioten finalari, eta hernaniarraren bi sakerekin eta Matxinek errebotera ondo jotako beste birekin egin zuten aurreneko tartea gorriek (6-2). Baina berdindu egin zen partidua gero, Matxinen hiru akatsekin (6-5); eta hortik aurrera, tanto zoragarriak jokatu zituzten denek: airez jaso eta dejadaz ederki errematatutakoa Urrizak, sakea bildu eta primeran bukatutakoa Matxinek, defentsan sekulako lana egin ondoren bi paretaz bukatutakoa Barrenetxeak... 10-11 aurreratu ziren aurrenekoz urdinak, eta berdindutakoan, pelota aldatu zuten gorriek.
Orduan egin zuen min gehien saketik, hernaniarrak, eta 18-11 egin zuten ihes. Tartean jokatu zuten, beharbada, partiduko tantorik onena, 37 pelotakadakoa: sekulako pelotak jaso zituzten Urrizak eta Barrenetxeak bereziki, eta hernaniarrak bukatu zuen, bi pareta altua barruan jarri eta sarera bidalita, ezin dotoreago. Ederra izan zen bolada horretako azkena ere, Matxinen eskutik, aurrean justu-justu pelota jaso eta txapa gainean utzita.
Urrizaren nagusitasunari esker, partiduari buelta
20-12koarekin lortu zuten abantaila haundiena gorriek, eta urdinak gerturatzen saiatu arren, 25-18 eta 27-20 ere izan ziren aurretik. Baina orduan hasi zen Urriza, bere maila onena ematen, aurretik ondo aritu bazen ere. Tantoak dominatzen hasi zen, eta gorriek ezin bera jokoan sartzea saihestu. Iruindarrak ia segidan egindako lau tantorekin, eta Matxinen zenbait huts tarteko, bigarrenez aurreratu ziren urdinak (30-31)... eta gorriek ez zuten berriro berdinduko.
Jokoan nagusi eta tantoak bukatzen, 30-33ra haunditu zuen tartea Urrizak, baina defentsan sekulako pelotak jasota eta errebotetik tantoa borobilduta, txalo zaparrada haundiak jaso zituen Barrenetxeak ere, partidua bizirik mantenduz. Hala ere, bereari eutsi zion Urrizak, eta 32-37koa jarri zuen markagailuan.
Tartea arriskutsua zen dagoeneko, baina amorerik eman gabe, defentsa nekaezin aritu ziren Barrenetxea zein Matxin, eta aukera izandakoan, bikain bukatu zuten; zoragarria Matxinek bi paretaz jotako bat. Eta tanto bakarrera jartzea lortu zuten horrela (36-37). Orduan, txartzat jo zuten epaileek, Barrenetxeak zabalean jotako pelota bat, eta berdinketarako aukeratik 36-38ra pasa ziren.
Saketik egin zuen 39garrena Larrañagak, eta huts nabarmena hurrengoan: Matxinen hankean jo zuen pelotak, eta minduta, aldageletara jo behar izan zuen aurrelariak. Handik bueltan, berehala bukatu zuen azkeneko tantoa Urrizak, ezker paretan bizi jota (37-40).
10 tanto egin eta 4 galduta bukatu zuen Barrenetxeak, eta 16 tanto egin eta 9 galduta Matxinek. Urrizak, berriz, 17 egin eta 5 galdu zituen, eta Larrañagak 10 egin eta 6 galdu
Atzokoarekin, bosgarren txapela du Urrizak, eta estreinakoa Larrañagak.