Trafikoaren eta oinezkoen arteko mugikortasun arazoak konpontzeko seinalizazio bereziak jarri zituen Udalak Portu auzotik Elizatxora dijoan bidean. Bere funtzioa betetzen dute lurrean jarritako markek, baina Gabon hauetan, beste erabilera bat emateko proposamena ere egin du Udalak, aisialdiari begira.
Horrela, gaur arratsaldean curling kirola probatzeko aukera izango dute bertaratzen direnek.
Pasabidea itxita, arratsaldean
Curling-a, berez, izotzezko pista batean jokatzen den kirola da. Lau kideko bi talde aritzen dira elkarren kontra, eta helburua izaten da 20 kilogramotako 8 harri, 45,5 metroko luzera eta 4,75 metroko zabalera izaten duen curling pistaren bukaeran dagoen dianara bota eta ahalik eta ondoen kokatzea.
Kasu honetan, Portu eta Elizatxo arteko pasabidea ez da ez izotzezkoa eta ezta hain luzea ere, baina curling pistako marken antzekoak dauzka, eta baita zabalera ere. Horregatik, Gabonetako oporraldian «familian egiteko aisialdirako proposamena» luzatu du Udalak.
Kirolean adituak diren bi lagun ariko dira arratsaldeko 16:30etatik aurrera, nola jokatu erakusten eta praktikatzeko aukera ematen. Hori horrela, bidea itxita egongo da 16:00etatik 20:00ak arte.