Urte bukaerara gerturatu bezala, gero eta gertuago dago Hernaniko Bertso Eskolak, Iraulio Panttalone Bertso Kabiyak antolatutako Bertsolataren bukaera ere. Baina ekitaldi potoloenetako bat falta da oraindik: bertso jaialdia.
Gaur izango da, arratsaldeko 19:00etan hasita, Biteri kultur etxean, eta puntako sei bertsolari igoko dira oholtza gainera: Andoni Egaña, Alaia Martin, Oihana Iguaran, Eñaut Martikorena, Eli Pagola eta Amets Arzallus. Gaia jartzen ariko zaiena ere, ez da nolanahikoa: Maialen Lujanbio bera ariko da lan horretan.
Sarrera guztiak gaur bertan jarriko dira salgai, emanaldia hasi baino ordubete inguru lehenago, Biteri kultur etxean bertan.
Bertso jarriek, arrakasta
Bertsolatari bukaera emateko, Urte Zaharreko erronda geratzen da oraindik. Aurretik, baina, makina bat ekitaldi izan dira. Azkena, ostegunean Agirre anaiek Imanol Kamio eta Jexux Mari Irazuren laguntzarekin eskainitako Auskalo zeinek jarriak emanaldia.
Bete egin zen Biteriko aretoa, eta Doberak eskerrak eman nahi dizkie herritarrei eta emanaldiko protagonistei, bildutako dirua elkartea laguntzeko bideratu delako.