Haurrei zuzendutako antzezlanekin gozatzeko aukera izango da Biterin, urtea bukatu eta berria hasteko. Gaur arratsaldeko 18:00etan ikusi ahal izango da aurrenekoa: 7 burbujas konpainiaren Burbuilak.
Hurrengoa, urtarrilaren 2rako antolatu da: Teatro Che y Moche konpainiaren Lau urtaroak: zein ziren eta zer dira.
Sarrerak salgai, bi emanaldietarako
Gaurko emanaldia 3 urtetik gorako haurrei zuzendutakoa izango da, eta 3 eurotan daude sarrerak salgai, Biterin bertan.
Testurik gabeko antzezlana eskainiko dute Esther Muñoz eta Israel Muñoz antzezleek, Isabel Muñozen zuzendaritzapean. Xaboi burbuilekin egindako komedia eroa da prestatu dutena, eta publikoa egingo dute protagonista. Burbuilek irudimena eta ametsak pizteko balioko dute, magiaz eta umorez beteta, eta horiekin gozatzeko gonbidapena luzatuko diete ikus-entzuleei.
Urtarrilaren 2ko emanaldia, bestalde, 6 urtetik gorako haurrei zuzendutakoa izango da, 65 minutukoa, eta musikaz lagundutakoa, eta sarrerak salgai daude emanaldi honetarako ere, 3 eurotan, Biterin.
Kasu honetan, Teresa Plyvkaren zuzendaritzapean ariko dira aldi berean antzezle eta musikari lanak egingo dituzten Fernando Lleida, Elva Trullén, Tereza Polyvka, Kike Lera, Fran Gazol eta Joaquín Murillo. Vivaldiren Lau Urtaroak musika unibertsaletik sortutako komedia bat eskainiko dute. Sokazko musika tresnak jotzen daukaten abilezia erakutsiko dute, ikuskizun harrigarri eta dibertigarri baten bueltan.