Emanaldi berezia prestatu dute gaur arratsalderako, Unai eta Eñaut Agirre anaiek: Auskalo zeinek jarriak bertso jarrien saioa eskainiko dute Biteriko areto nagusian, 19:00etan hasita. Eta gaurkoan, beste bi lagun ere izango dira haiekin: Imanol Kamio musikaria, eta Jexux Mari Irazu bertsolaria.
Iraulio Panttalone Bertso Kabiyak antolatutako Bertsolataren barruan eskainiko dute emanaldia, eta azkeneko sarrerak salgai daude, 7 euroan: Dobera Euskara Elkartearen bulegoan (Larramendi kalea 11), edo 18:00etatik aurrera Biterin. Izan ere, bildutako dirua Doberari laguntzeko izango da.
«Garai batean ohikoa izaten zen bertso jarriak kantatzea, eta gaur egun hori ez da erabat hautsi, nahiz eta bat-batekoak presentzia gehiago duen. Ezkutatuago egon da bertso jarria, eta bere lekua eman nahi diogu», azaldu dute.
Eta horretarako, bertso zahar zein berriak ekarriko dituzte taula gainera; tartean, XIX. mendean Xenpelar osaba-ilobek kantatutakoak. Kamioren musikak lagunduta ariko dira bertsotan, baina baita a capella ere: «zati bat erreserbatua daukagu horretarako», aurreratu dute Agirre anaiek.