Egitarau berezia prestatu du Hernaniko Udalak, aurten ere, neguko oporraldiaz gozatu dezaten herritarrek; eta bereziki, haur eta gaztetxoek.
Horri hasiera emateko, zinea izango da gaur eta bihar, haurrei zuzenduta. Kikoriki pelikula jarriko dute, bi egunetan arratsaldeko 16:30etan, Biterin.
Uharte baketsua da Kikoriki, baina abentura haundi batean murgilduko dira bertako bizilagunak. Izan ere, uharteko zientzialari batek gailu harrigarri bat asmatu du: pertsona baten nortasun ezaugarriak hartu, eta beste pertsona batenekin aldatzen ditu.
Eta astelehenean, aukera bikoitza izango dute. Batetik, ludoteka jarriko dute kiroldegian, 10:00etatik 13:00etara. Eta bestetik, Biterin, Argigrama tailerra eskainiko du Nagore Legarreta artista hernaniarrak, bi txandatan: 16:00etatik 18:00etara, eta 18:00etatik 20:00etara. Hori bai, horretarako aurrez eman behar da izena. 6 urtetik gorakoentzat da; 10 urtetik beherakoek, heldu batekin joan behar dute.