Ostegunean egin zuen Hernaniko Udalak, ezohiko deialdian, urteko azkeneko Plenoa. Eta bertan onartu zuten 2020ko Udal Aurrekontua; kontrako botorik ez zen izan, gainera: abstenitu egin ziren oposizioko hiru alderdiak, EAJ-PNV, Orain Hernani eta PSE-EE; eta EH Bilduren aldeko botoekin onartu ziren.
Guztiek nabarmendu zuten, egindako bileretan izan den «elkar ulertze ona». Xabier Lertxundi alkateak adierazi zuen, «modu positiboan» baloratu dituztela alderdiekin bilerak: «oso nabarmentzekoa da EAJren jarrera aldaketa eta elkarlanerako borondatea. Positiboak izan dira bilerak Orain Hernani eta PSE-EErekin ere, eta horien emaitza ikusi daiteke aurrekontuan. Oso emaitza ona da, alderdi guztien ekarpenak jasotzen dituelako; eta espero dugu legealdian zehar hala izaten jarraitzea eta elkarlanean aritzea».
Isa Sanchez ogasun zinegotziak azaldu zituen 29.549.159 euroko aurrekontuaren hainbat xehetasun: «iazkoaren aldean aurrekontua txikitu arren, herritarrentzako zerbitzuak mantenduko dira, eta ongintzaren aurrekontua %13 haunditu dugu, bereziki langileen baldintzak hobetzeko. Udalak ez du mailegurik eskatu beharko, beste behin». Eta era berean, aipatu zituen onartu diren oposizioko alderdien proposamenak. EAJ-PNVren bost emendakin txertatu dira, Orain Hernaniren lau, eta PSE-EEren hiru.
EAJko Jose Antonio Cuestak azaldu zuen, pozik daudela txertatu diren gaiekin, udaletxeko funtzionamenduari eta zerbitzuei dagokienean, «nahiz eta nahiko genukeen atez atekoari buruzko eztabaida sartzea».
Orain Hernaniko Jaione Aristregik berretsi zuen «bilera positiboak» izan direla, baina gehiago espero genuen; kontinuista iruditu zaigu aurrekontua, beharbada legealdiko aurrenekoak direlako da. Onartutako proposamenak exkaxak iruditzen zaizkigu, baina konfiantza boto bat eman nahi diegu».
PSE-EEko Ricardo Crespok azaldu zuen, badaudela zenbait gai «inoiz ados egongo ez garenak», baina emendakin partzialak ere aurkeztu zituztela: «emendakin horiek negoziatu genituen, eta sintonia ona egon zen bileretan. Abstenitzea erabaki dugu, gai batzuetan izan den elkar ulertze onagatik».
Zikuñaga papelerari baimena onartuta, haunditzeko
Gainerako gaien artean, onartu egin zuten baimena ematea Zikuñaga papelerari, haunditu eta beste eraikin bat jartzeko, behin URA agentziaren zein Ingurumen Sailaren txostenak jasota; «baina baldintza eta betebehar batzuekin», Mattin Aldaia zinegotziak azaldu zuenez. Alde bozkatu zuten denek, Orain Hernanik izan ezik; abstenitu egin zen: «ez zaizkigu gustatzen papeleraren ke eta usainak, baina abstenituko gara, txostenak alde dituelako eta 50 lanpostu berri sortuko dituelako. Baina hasieratik kontrolatu beharko da, baldintzak zorrotz betetzen direla», azaldu zuen Aristregik.
Aldiz, aho batez onartu ziren eskola kiroleko ereduaren berrespena, Udal Euskaltegiko zuzendari aldaketa, hitzarmena sinatzea Beterri Errotuz laneratze enpresa kontratatzeko, eta Dirulaguntzen 2020-2022 Plan Estrategikoaren onarpena.
Eta onartu zen baita ere, EH Bilduren botoekin, Hernaniko Udaleko, Ereñotzuko Auzo Udaleko eta Ongintzako Plantilla Organikoaren eta Lanpostuen zerrenda. «Orain dela zortzi bat urte hasi zen lanpostuen balorazioa, aurrekoa 1989koa baitzen. Azken emaitza ez da guk nahiko genukeena, Espainiako legediak asko mugatu baitu; baina oso lan aberatsa izan da, langileek sekulako lana egin dute», adierazi zuen alkateak. Abstenitu egin zen oposizioa: «ez gaude kontra, pozten gara behingoz egin delako balorazioa. Baina uste dugu lanpostu batzuek balorazio sakonagoa behar luketela», azaldu zuen Crespok.