Santo Tomas feriak Hernanin ez du etenik. Aurreko larunbatean hasi ziren ospatzen eta jarraipena izango du bihar arte. Hala ere, Santo Tomas eguna gaur da eta aukera zabala egongo da txistorra jateko.
Gaur Goiz Eguzkin, Floridan eta Plaza Berrin CD Hernanik
Urteroko zita jarri du Goiz Eguzki jubilatuen elkarteak 11:00etan hasita, gonbidatuei harrera egin eta banatuko dituzte udazkeneko karta eta herri jolas txapelketetako sariak. Ondoren, Gabonetako lau saski zozketatuko dituzte; eta azkenik, txistorrada izango da.
Hernaniko gaztetxoek ere, Gaztelekuan txistorrada egingo dute. Eta Donostian jarriko du postua San Joan Konpartsak, Gipuzkoa plazan.
CD Hernaniko futbol sekzioak Plaza Berrin jarriko du postua. 10:00etatik aurrera egun guztian zehar egongo dira 20:00ak arte eta bertan jokalari, entrenatzaile, kolaboratzaile eta gurasoak izango dira. Janari eta edariaz gain, sorpresa gehiago izango da.
Floridan ere, Auzokidek Santo Tomas eguna ospatuko du, 10:00etatik hasita, tabernaren eta elkarteko lokalaren ondoan.
Portun eta Lizeagan bihar
Eta Santo Tomaseko ospakizunekin bukatzeko, bihar jarri du hitzordua Gibelaldek, Lizeagako auzo elkarteak. Eguerdiko 12:30etan jarriko dute postua, Urumea ikastolan; eta saski bat zozketatuko dute 13:00etan, elkarteko bazkideen artean.
Bihar egingo dute txistorrada Portu auzoan ere, 12:00etan Ibarrolaburu plazan; eta bertan ere zozketatuko dute saskia.
Atzo, Zelabide auzo elkarteak, aurrenekoz, Santo Tomaseko txistorrada ere antolatu zuen. Gabriel Zelaia plazan giro ezin hobean.