GAUR, arratsaldeko 19:00etan, Zine eta Migrazioen Nazioarteko 2019ko Jaialdiko luzemetrai zein laburmetraiak ikusteko aukera egongo da, Biterin, Hernani Solidarioaren eskutik. Eta bihar berriz, arratsaldeko 18:00etan, jatorriko magrebiarreko gazteek egindako antzerki bat egongo da Urumea Herri Gunean. Hortaz gain, Migranteen Nazioarteko eguna dela gogoratuz, jardunaldiaren amaieran hainbat testu irakurtzeaz gain, mokadu bat jateko aukera ere egongo da.
Duela bost urteko kontuak
Bost urte igaro dira, hainbat elkarte edo eragilek bat egin eta Hernani Solidarioa sortu zutenetik. Hasieratik finkatu zituzten helburu argiak, hala nola, elkartasuna eta lankidetza sustatzea, pertsona solidarioek eta bereziki etorkinek Hernaniri egiten dioten ekarpena nabarmentzeko asmoz.
Urte honetan hainbat jardunaldi antolatu dituzte, abenduaren 10etik 18ra bitartean. «Eta egitarau hau, Amher, Stop Kaleratzeak eta Udaleko Kulturartekotasun eta Gazteria arloak antolatu dugu elkarlanean, Urumea Herrigunearen laguntzarekin».
Abenduaren 10ean, Giza Eskubideen Adierazpen Unibertsala gogoratzen da nazioarte mailan, eta horregatik antolatu ziren tailerrak eta jardunaldien aurkezpenak. Bihar ordea, Migranteen Nazioarteko eguna izanik, antzerkia egingo da arratsaldeko 18:00etan Urumea Herri Gunean, giza eskubideen urraketa ezberdinak ikusarazi eta salatzeko asmotan. «Zorritxarrez giza eskubideen urraketa hauetako asko beste herrialdeetatik gure herri honetara etorritakoek oso modu nabarmenean bizi dituzte». Eta gaur berriz zinea izango da Biteriko pantailan, arratsaldeko 19:00etan.
Esker hitzak, Hernani Solidarioaren partetik
Bost urte daramatzate, proiektu honekin, eta oraindik ere tinko jarraitzen du Hernani Solidarioak. Hori dela eta, esker hitzak luzatu nahi izan dituzte orainarteko ibilbidean laguntzaile izan diren guztiei: «Hernani, elkarbizitza eta elkartasun sareak sustatzen dituzten pertsona eta elkarte askori esker, herri justuagoa dela ikusarazi nahi dugu ».