Ostegunean hasitakoari, aste honetan emango zaio segida: Hernaniko Iraulio Panttalone Bertso Kabiyak urtero Gabonetan antolatzen duen Bertsolatako egitarauan, ostiralean izango da hurrengo zita.
Dobera eta Kronikako bazkideek, ordea, badute beste hitzordu bat: Auskalo zeinek jarriak bertso saiorako sarrerak erosteko lehentasuna izango dute bihar arte. Hortik aurrera, herritar guztiei irekiko zaie aukera. Sarrerak Dobera Euskara Elkartean egongo dira salgai, bai bazkideentzat eta baita bazkide ez direnentzat ere, 7 euroan. Bildutako dirua Dobera laguntzeko izango da.
Saioa abenduaren 26an izango da, 19:00etan Biterin. Eñaut eta Unai Agirre anaiak ariko dira kantari, bertso historikoak eta egungoak nahasiz. XIX. mendeko Xenpelar osaba-iloben bertsoak, hau da, Juan Frantzisko Petriarena Rekondorenak eta Joxepa Antoni Aranberri Petriarenarenak izango dira tartean, adibidez.
Bertso-poteoa, ostiralean
Egitarauari segida emateko, ordea, ostiralean, hilaren 20an jarri da hurrengo hitzordua. Bertso-poteoa egin ahal izango da hainbat bertsolarirekin, Kaxkoan barrena.