Emozio haundiko partidua izan zen atzo Anoetako miniestadioan bizitakoa. Landare urak hartu zuela-eta, Donostian jokatu behar izan zuen Hernanik etxeko partidua, Bartzelonaren aurka. Baina zailtasun guztiei aurre egiteko prest dagoen taldea da hernaniarrena, eta halaxe erakutsi zuten atzo, denboraldiko aurreneko garaipena lortuta.
Atsedenaldira arte atzetik, baina pareko
Ez zirudien ezer aldeko izango zuenik Hernanik. Etxeko partidua etxean ezin jokatzeari gehitu behar izan zioten aurrez aurre Bartzelona izatea; sailkapenean 7garren dijoa, erdi-parean, eta Hernani, azkena.
Partidua hasi eta berehala nabarmendu nahi izan zuen bi taldeen arteko alde hori arerioak, eta hirugarren minuturako aurreneko entsegua eta transformazioa egin zituen; 0-7. Hernanik, ordea, 15garren minuturako erantzun zion, berdin; 7-7. Atsedenaldiaren aurretik beste entsegu bana egin zuten bi taldeek; 12-12.
Bukatu arte, galdutakorik ez
Atsedenalditik bueltan Bartzelonak garaipenarekin etxeratzeko asmoa erakutsi zuen. Zigor kolpe batekin Hernanik bi puntu bildu bazituen ere, Bartzelonak entsegua eta transformazioa, eta zigor entsegua lortu zituen 55garren minuturako, eta markagailuan ihes egingo zuela ematen zuen; 15-26. Hernanik beste zigor kolpe batekin beste pare bat puntu bildu zituen gero, baina Bartzelonak partiduko bosgarren entseguarekin erantzun zuen 68garren minutuan; 18-31.
Hernanik, ordea, ondotxo daki ez dagoela ezer galduta, bukatu arte, eta hortzak estutu eta presioa egiten hasi zen. Baita ederki bultza ere! 75 eta 80garren minutuetan hiru eta laugarren entseguak eta transformazioak eginda eskuratu zuen garaipena; denboraldiko aurrenekoa! Urtea bukatzeko ezin borobilagoa, hurrena urtarrilean jokatuko baitu, sailkapenean zortzigarren dijoan Cienciasen kontra.