Durangoko Azokan dagoeneko salgai jarri bazen ere, asteazkenean aurkeztu zuten Basoko begiak ipuina, Donostiako Udal Liburutegiko sotoan. Salgai ere jarri da, besteak beste, Hernaniko Elkar dendan, 14 euroan.
Iñaki Sanz-Azkue biologoak eta Ainara Azpiazu Aduriz Axpi komikilari eta ilustratzaileak egin dute, eta Lamiñarra argitaletxeak kaleratu du. Zuzenketa eta itzultzaile lanetan aritu dira, bestalde, Larraitz Garmendia, Fernando Ruiz eta Leire Otxotorena.
Aurkezpenean azaldu bezala, «karanbola batetik» sortu da ipuina. Izan ere, Axpik Zugarramaurdiko Sorginen Museorako lan bat bukatu berri zuen Iñaki ipuinaren proposamenarekin gerturatu zitzaionean, eta Sorginen Museoari gustatu egin zitzaion.
Ipuineko protagonista Mieltxo izeneko umea da, baina gero, meta, basajauna, aitona... izan daitekeen pertsonaia ere badago. «Pertsonaiak ez finkatzeak ematen duen misterio puntua hor dago», azaldu zuten. «Asmoa izan da ipuina irekia izatea, umeei sormenerako aukera emateko». Mitologia eta natura nahasten dituen ipuinarekin sortu dute horretarako unibertsoa.