Hernanik Barcelonaren aurka jokatuko du bihar, eguerdiko 13:30etan, urteko azkeneko partidua. Baina ez da Landaren izango, Donostiako Anoetako miniestadioan baizik. Izan ere, urak hartu zuen Landare, atzo.
Biharko helburua, argia da: denboraldiko lehenengo garaipena lortu eta urte berria indarberrituta hastea.
Denboraldia ez da erraza izaten ari, eta orain arte, hamar partiduetatik hamarrak galdu dituzte trikoloreek. Biharkoa, gainera, lehendabiziko itzuliko azkena izango da, eta irabaztea ia ezinbestekoa da. Gertuen dagoen aurkaria Cisneros da, zazpi puntura, eta puntuak murrizten hasi beharra daukate, bigarren itzulia luzeegia ez egiteko.
Hori bai, irabazteko dena beharko da: zaleen animoak, jokalarien maila igotzea, eta zortea lagun izatea ere bai. Orain arte dena oker atera da, eta buelta emateko garaia iritsi da.
Zalantzekin dator, eta berdinketetan espezialista da
Sailkapen nagusian zazpigarren dago kokatuta Barcelona, eta azkeneko bost jardunaldietan ez du garaipenik lortu. Denboraldia ezin hobeto hasi zuen, baina urriaren 20an lortu zuen azken garaipena. Ordutik hiru partidu berdindu dituzte, eta bi galdu. Liga osoan lau partidu berdindu dira, eta bereak dira hiru.