Asteburu garrantzitsua da Hernaniko palistentzat, datorrena. Bi bikotek finalak jokatuko dituzte Gipuzkoako Txapelketan, emakumezkoen gomazko paletan. Debako Aldats frontoian izango dira.
Hernaniko bi bikoteak nagusietan sailkatu dira finalera. Bigarren mailan Ekhine Balerdi eta Garazi Urdangarinek, Su-Berri 2 taldeko Lasarte eta Aranbururen kontra jokatuko dute txapela. Eta lehenengo mailan ariko dira Amaia Irazustabarrena, Ariane Arrieta eta Maider Huizik (oraindik erabakitzeko dago nork jokatuko duten) Su-Berri 2ko Larrarte, Galdos eta Maizaren kontra.
Finalak 10:30etan hasiko dira, baina lehenengoan, jubenilenean ez dago bikote hernaniarrik. Intxurreko bi bikote sailkatu dira. Final hori amaitzean, bigarren mailakoa jokatuko da; eta bukatzeko, txapelketako final haundia.
Atzo hasi zen Bizkaia Torneoa, larruzko paletan
Andrazkoen Larru Paletako bigarren Bizkaiako Torneoa ere hasi berri da, Bizkaiako Foru Aldundiak antolatuta. Atzo hasi zen, eta finala urtarrilaren 4an jokatuko da. Larrabetzun hasi zen txapelketa eta gainerako bi jardunaldiak eta finala, Bilboko Bizkaia Frontoian jokatuko dira.
Torneoan lau bikote ari dira jokatzen. Itzuli bakarreko ligaxka izango da aurrena, eta bost jokotara izango dira partiduak. Atzo Leire Galdos eta Leire Etxaniz, Ane Isasmendi eta Laura Saezen kontra aritu ziren; eta Amaia Irazustabarrena eta Amaia Araiztegi, Ane Maiza eta Maider Mendizabalen kontra.
Partidu horiek ez, beste guztiak Bizkaia Frontoian izango dira. Abenduaren 20an, arratsaldeko 19:30etan, Galdos eta Etxanizen kontra ariko dira Irazustabarrena eta Araiztegi; eta Isasmendi eta Saez, Maiza eta Mendizabalen aurka. Hilaren 27an jokatuko dira hurrengo partiduak: Galdos eta Etxaniz, Maiza eta Mendizabalen aurka; eta Irazustabarrena eta Araiztegi, Isasmendi eta Saezen kontra.
Finala, berriz, urtarrilaren 4an izango da, eta ETBk emango du zuzenean. Pelotariei kirol-kontratua egingo zaie.