2020ko inauterietako kartela aukeratzeko lehiaketa duela aste batzuk jarri zuen martxan Hernaniko Udalak eta gaur da, proposamenak aurkezteko azkeneko eguna.
Biterin entregatu behar dira, formatu digitalean. 32 zentimetroko zabalera izan behar dute, eta 48 zentimetroko altuera. Hernaniko Inauteriak 2020 goiburua izan behar dute. Sinadurarik gabe entregatu behar dira, kartazal itxian; eta bertan zehaztuko dira izen-abizenak, helbidea eta telefonoa. Irabazleak, 600 euroko saria jasoko du: 300 euro dirutan, eta beste 300 euro Berriak elkarteko dendetan erabiltzeko.
Bozkatzeko epea, etzitik abenduaren 26ra arte
Behin epea bukatuta, inauterietako Jai Batzordeak aurkeztutakoen artean, lau aukeratuko ditu, ondoren, herritarrek bozkatu ditzaten.
Bozkatzeko epe hori asteazkenetik, abenduaren 11, abenduaren 26ra izango da, eta bi bide izango dituzte herritarrek botoa emateko: internet bidez, edo Biterin bertan. Urtea bukatu aurretik, abenduaren 31n, jakinaraziko da irabazlearen izena.