Urtarrilaren 30ean Euskal Herriko Eskubide Sozialen Kartak izeneko greba orokorra deitu dute eta Buruntzaldeako Greba Batzordea osatzeko Batzar irekia egingo da bihar, 18:00etan, Hernaniko Biteri kultur etxean. Azaroaren 27an aurkeztu zuten greba orokorra.
Aldarrikapen taulak 30 neurritik gora jasotzen ditu eta hauek «zuzenduta daude prekarizazioari mugak jartzeko, azken urteetako murrizketak atzera botatzeko, prekarietatea ezabatzeko, lan baldintzak duintzeko eta eskubide sozialak defendatzeko. Bestelako eredu sozio-produktibo baten aldeko neurriak» direla nabarmendu zuten aurkezpenean.
Lan harremanetarako eta babes sozialerako esparru propioa, eskubide sozialen bermea eta 1.080 euroko gutxieneko pentsioaren aldarriak daude tartean. 2011 eta 2013ko erreformetan onetsitako pentsio-murrizketak indargabetzea, Zapatero eta Rajoiren lan erreformak bertan behera uztea eta eskubide sozialen bermea dira aldarrikatzen dituzten bestelako neurriak.
Ehun eragile sozialetik gora daude bertan, tartean euskal gehiengo sindikala –UGT eta CCOOk ez dute bat egin deialdiarekin.