Gabonak hurbil daudenaren adierazlerik nabarmenetakoa, besteak beste, musika kontzertuak izaten dira. Datorren astean urteroko bi zita garrantzitsu jarri dira, biak ere Milagrosan. Musikarekin gozatzen segitzeko aukera izango da datozen egunetan ere, Gabonen aitzakian. Datorren ostiralean, abenduaren 13an, ‘Hernani’ Musika Eskolako Hernasax eta akordeoi taldeak eta Txistulari Banda entzuteko aukera izango da.
Hernasax eta akordeoi orkestaren kontzertua 19:00etan hasiko da. Hortik bi egunetara, gaur zortzi, Gabonetako Txistulari Kontzertuak hartuko dio erreleboa, hau ere Milagrosan. 13:00etan hasita elkarrekin ariko dira Juan Jose Arregiri eskerrak emanez taldea, Txistulari Banda, biolin-jotzailea eta piano-jotzailea.
Jarraipena izango dute emanaldi gehiagorekin
Lehendabiziko biak izango dira Hernasax eta Txistularien Banden kontzertuak, baina ez azkenak. Ondoren etorriko dira ‘Hernani’ Musika Eskolako teklatu ikasleen emanaldia, Gabon kanten jaialdia eta urteroko Gabonetako Kontzertua.
'Hernani' Musika Eskolako teklatu taldearen kontzertua, abenduaren 18an izango da, 19:00etan hasita, Biterin. Gabon kanten jaialdia, kantuzek antolatuta, abenduaren 19an, ostegunez, egingo da San Joan Bataiatzailearen elizan, 20:00etan. Herriko eta ikastoletako abesbatzak ariko dira.
Abesbatzak eta Banda, Santo Tomas egunean
Santo Tomas egunean elkarrekin ariko dira Hernaniko Musika Banda eta Ozenki abesbatza, eta Goizuetako Umore Ona abesbatza ere gonbidatu dute. San Joan Bataiatzailea elizan ariko dira denak batera, 20:00etan.