13garren urteurreneko ospakizunetan murgilduta dago Kontrakantxa gaztetxea, ostegunetik. Giro ederrean egin zuten bertso afari jendetsua, Ane Zuazubiskar, Aitor Bizkarra eta Eñaut Martikorenaren bertsoekin, pintxopotearen ondoren, eta behin Hilerokoa aldizkariaren ale berria aurkeztuta.
Biharko jarri dute bigarren hitzordua, aste hau ondo bukatu, eta hurrengoari, ospakizunen aste potoloari, bidea egiteko. Mendi martxa antolatu dute, eta Adarrara igoko dira, goizeko 08:00etan elkartuta. Gainera, menditik bueltan, bazkaria egingo dute elkarrekin, eguna borobiltzeko.
Baina, esan bezala, datorren astea izango da, ekintza gehien bilduko dituena. Izan ere, asteazkenetik igandera, egitarau zabala prestatu dute. Auzolanerako jarri dute hitzordua asteazkenean bertan, arratsaldeko 17:00etan. Eta ostegunean, pizzapotea eta argazki erakusketa jarriko dituzte Kontrakantxan, 18:00etatik aurrera.
Okupazioari buruzko hitzaldia, ostiralean
Baina ekintza gehien, ostiralean eta larunbatean izango dituzte. Hasteko, ostiralean bertan, okupazioari buruzko hitzaldia antolatu dute, Kontrakantxan, arratsaldeko 19:00etan hasita: Okupazioa eta etxebizitza problematika. Gasteizko Etxebizitza Sindikatuak eskainiko du.
Ondoren, Jantoki Soziala zabalduko dute, gaueko 21:30etan; eta eguna borobildu eta asteburuari bidea egiteko, kontzertua izango da, Erroka musika taldearen eskutik.
Larunbat eguerdian izango du segida festak. Gaztetxea kalera aterako dute 12:00etan, eta herri bazkarirako jarri dute hitzordua ondoren, 14:30etan. Hortik aurrera, musikak hartuko du protagonismoa, berriro. Aurrena, Zuttik Elektrotxaranga hernaniarrak jarriko du giroa, arratsalde osoan zehar. Eta gero, gaueko 22:30etan hasita, kontzertuak izango dira.
Igandean, berriz, ospakizunaren ondorena etorriko da: auzolanean gaztetxea garbitzeko jarri dute hitzordua, arratsaldeko 18:00etan.
Lur berriak lelopean, aurten abiatutako dinamika eta borroka ezberdinak herrira zabaldu nahi izan dituzte ekintza horiekin, Gazte Asanbladaren lana ezagutaraziz. Eta horrekin batera, «antolatzearen beharra» eman nahi dute aditzera, «gazte problematikaren esparru ezberdinei erantzuteko». Belaunaldi ezberdinen arteko harremanak ere sortu nahi dituzte.