Urtea bukatzeko Wukroren aldeko San Silvestre lasterketa antolatu du aurten ere CD Hernaniko Atletismo Sailak, abenduaren 31rako. Adin-tarteka banatuta, hiru lasterketa egingo dira; hirurak, denok egiteko modukoak, helburu nagusia Wukrora bidaltzeko dirua biltzea baita.
Laguntza, festa giroan
Urtero bezala, Atletismo Sailak Hernani Wukro Fundazioarekin elkarlanean antolatu du urtea bukatzeko lasterketa, eta «irabazten dena, bere osotasunean, Wukroko oinarri sozioekonomikoa sendotzera egongo da zuzendua», argitu dutenez.
Ekintzak hiru helburu nagusi dituela zehaztu dute. «Wukrora laguntza bidaltzeko diru errekurtsoak biltzea, adin guztietako jendea Wukroko errealitatearekin kontzientziatzea, eta Gabonen barruan, herri osoarentzat festa bat antolatzea».
Izen-ematea, irekita
Hain zuzen, denentzako moduko herri lasterketa da abenduaren 31koa. Arratsaldeko 17:30etan 8 urte artekoentzako lasterketa egingo da, 300 metrokoa. Gero, 17:45etan, 8 eta 13 urte artekoena, 800 metrokoa. Eta azkenik, lasterketa nagusia, 18:00etan, 13 urtetik gorakoentzat. Hau, 4 kilometrotakoa. Azken honetarako bakarrik eman behar da izena, eta irekia dago izen-ematea, rockthesport.com webgunean.