Bukatzear dago aurreneko fasea, Binakako Txapelketan; eta osteguneko emaitzekin, ia ziurtatuta dauka semifinaletara pasea, Endika Barrenetxea hernaniarrak. Gaur jokatuko du ligaxkako azkeneko partidua, eta nahikoa izango du 26 tanto lortzea, Juanenearekin batera, hurrengo fasera pasatzeko.
Arratsaldeko 16:00etan hasiko da jaialdia Galarretan, eta bigarren partiduan ariko dira, Matxin III eta Endikaren kontra. Ondoren, ligaxka ixteko, jokatuko dute Urriza eta Larrañagak, Ansa II eta Ionen kontra.
Atzelarien artean bigarren oraingoz, Barrenetxea
Bikote konpletoak beharrean, postu bakoitzeko hiru erremontista onenak pasako dira semifinaletako ligaxkara. Eta atzelarien arteko lehian, bigarrena da hernaniarra, oraingoz; Azpiroz izango da aurrenekoa, ziur.
19 puntu dauzka Barrenetxeak, 18 Endikak, eta 12na Ionek eta Larrañagak. Gainera, gutxienez bi puntu lortuko ditu hernaniarrak gaur, bi atzelarien artean tanto gutxien lortzekotan; bestela, lau puntu. Bi puntu horiekin, bederatziko abantaila izango luke, Ion eta Larrañagarekin, eta soilik partiduko markagailuagatik puntu negatibo bat jasotzeak (25 tanto edo gutxiagoan geratuz gero), izango luke arriskuan pasea. Ionek eta Larrañagak 8 puntu lortu ditzakete gehienez: irabazteagatik 4 puntu, eta atzelari onena izateagatik beste 4.
Zailagoa dauka, aldiz, Juanenea bikoteak. 13 punturekin, laugarren dago, eta aurretik dauzka Matxin III (18 puntu) eta Urriza (16 puntu). Atzetik dago Ansa II, 12 punturekin. Borroka estua izango da lauen artean, beraz, gaurko partiduetan pasea lortzeko. Aurreneko postuak, jabea dauka ostegunetik: Uterga izango da, 30 punturekin.
Txapelketako bikote sendoena izan da orain arte, Utergak eta Azpirozek osatu dutena. Jokatutako lau partiduak irabazi dituzte, eta horietatik, hirutan izan da aurrelari onena Uterga, eta bitan atzelari onena Azpiroz. Urriza eta Larrañaga menderatu zituzten ostegunean (40-38), beraien azkeneko partiduan.
Semifinaletarako bikoteak osatzeko dantza, gaurkoan
Zein erremontistak egingo duten aurrera bakarrik ez, gehiago ere egongo da jokoan, gaurko bi partiduetan. Izan ere, aldatu egingo dira bikoteak, semifinaletarako; eta honela osatuko dira: aurrelari onena, hirugarren atzelariarekin; bigarren aurrelari eta atzelaria elkarrekin; eta atzelari onena, hirugarren aurrelariarekin.
Hortaz, ikusmina piztuko du, bikoteak osatzeko dantza horrek. Konbinazio posible guztiak daude aukeran, Uterga eta Azpiroz berriro elkarrekin aritzekoa izan ezik. Bikote horiek mantenduko dira txapelketaren bukaerara arte, eta semifinaletako bi bikote onenek jokatuko dute finala.