Dagoeneko jakinarazi dute, Erabaki Hernani prozesuko zein proposamen aukeratu dituzten herritarrek, 2020ko Udal Aurrekontuan txertatzeko. Ostegunean aurkeztu zituzten azkeneko emaitzak, eta aukeran zeuden 22 proposamenetatik, erdia gauzatuko ditu Udalak: 11 proposamen jasoko ditu, datorren urteko aurrekontuak.
Proposamen guztien artean, bozkatuena izan da barazki eta fruta dendetatik poltsatxoak erretiratzeko kanpaina egitea, 789 botorekin. Haren atzetik, sailkatu dira Kaxkoko argiteria publikoa LEDera aldatu eta horietan smart teknologia jartzeko proposamena; eta herriko haurrek diseinatu duten sokadun parkea egitea. Gauzatu egingo dira hiru horiek, beste zortzi proposamenekin batera.
Ez da aurrera eramango, ordea, Zubipe futbol zelaiaren harmailen azpian solairuarteko bat eraikitzeko proposamena, biltegi modura erabiltzeko. Hamargarren proposamen bozkatuena izan da, baina 124.407,36 euroko aurrekontua dauka; eta bere txanda iristerako, 66.836 euro bakarrik geratzen ziren, boto gehiago zeuzkaten proposamenen aurrekontua kenduta.
1.264 herritarrek, botoa
Urriaren 28tik azaroaren 24ra bitarte izan dute bozkatzeko aukera, herritarrek; eta guztira, 1.264 izan dira, botoa eman dutenak. Horietatik 64 baliogabeak izan dira, erroldan ez egoteagatik, datu pertsonalak ez zehazteagatik, edo 10 proposamen baino gehiago edo gutxiago bozkatzeagatik. Beraz, 1.200 boto izan dira baliodunak: 783 herritar, 16 urtetik gorakoak; eta 417 ikasle, 8-15 urtekoak, ikastetxeetan bozkatu dutenak, Inmakuladan, Hernani BHIn eta Ereñotzuko Txirritan.
783 boto horietatik, 451 jaso dira webgunearen bitartez, guztien %57,6a; eta gainerakoak, 332 boto, buzoietan (%42,4).
ERABAKI HERNANI 2020 - AUKERATUTAKO PROPOSAMENAK
2020 urtean, barazki eta fruta dendetatik poltsatxoak erretiratzeko kanpaina egitea (789 boto) 10.000 euro
Kaxkoko argiteria publikoa LEDera pasatzea, eta horietan 'smart' teknologia ezartzea (722 boto) 125.000 euro
Herriko haurrek diseinatu duten sokadun parkea egitea (721 boto) 104.000 euro
Garbigune ibiltariaren zerbitzua sortzeko, kamioneta txikia eta erremolkea eskuratzea (688 boto) 66.000 euro
Adinekoei tramite ofizialak betetzeko laguntza teknikoa auzoetan, hilean bi orduz (672 boto) 9.075 euro
'Nere borda' parke botanikoa birgaitzea (659 boto) 50.000 euro
Teknologia berrien inguruko ikastaroak adinekoentzat auzoz auzo (638 boto) 1.089 euro
Bertako produktuen ekoizpena sustatzeko diru-laguntzak ematea herriko ekoizleei (630 boto) 50.000 euro
Festa eta ekintzetan edalontzi berrerabilgarriak erabiltzeko lanketa eta sentsibilizazio-kanpaina (601 boto) 18.000 euro
Zubipe eta Landareren artean dagoen aparkalekua egokitzea (554 boto) 33.396 euro
Auzoen eta erdigunearen arteko mugikortasuna errazteko, bizikletak gordetzeko kaiola itxiak (529 boto) 36.300 euro*
*33.440 euroko aurrekontuarekin gauzatuko da. Kopuru hori da 500.000 eurora iristeko geratzen zena, eta horrekin egingarria dela baieztatu dute udal teknikariek.