Erakusketa berri bat hartuko du gaurtik, Chillida Lekuko Zabalaga baserriak. Argiaren bila inauguratuko dute, Eduardo Chillidaren obran zehar ibilbidea egiten duen erakusketa, argiaren eta arkitekturaren bitartez.
Bi kontzeptu horien inguruan, Chillidak egin zuen ikerketa islatzen du erakusketak, 40 obraren bitartez. Horietatik 31, material ezberdinekin egindako piezak dira: alabastroa, portzelana, papera, burdina, altzairua eta lur txamota. Eta beste bederatziak, grabitazioak dira. Horien bitartez, ikusarazi nahi dute «askotariko formatuak erabili zituela Eduardo Chillidak, ideia horietan murgiltzeko».
1963an Greziara, Italiara eta Frantziara egin zuen bidaia, abiapuntua
Eduardo Chillidaren bidaia bat da erakusketaren abiapuntua: 1963 urtean Greziara, Italiara eta Frantziako Provenzara egin zuena. «Kantauri itsasoaren argi ilunera ohituta zegoen, eta ibilbide horri esker, Mediterraneoaren argitasuna eta formak deskubritu zituen. Kontzeptu horiek, bere eskulturetan txertatu zituen», azaldu dute.
Abenduaren 12an, erakusketaren bisita gidatua egingo dute, arratsaldeko 17:00etan. Sarreraren prezioaren barne izango da. Hurrengo egunean, berriz, irakasleentzako bisita antolatu dute, gero ikasleekin klasean landu ditzaketen gaiak landu eta ikasleekin egin ditzaketen bisitak prestatzeko. Eta hain justu, abenduaren 14an, 6 eta 12 urte bitarteko haurrek ikusi ahal izango dute erakusketa, modu ludikoan: rayogramen tailerra egingo dute, Nagore Legarreta argazkilari hernaniarraren eskutik.