ASTIGARRAGA HERNANI FUTBOLA
Bihar jaieguna izanik, futbol eta kirol jardunaldia aurreratu egin dute talde askok. Honela Hernaniko mutil talde nagusiak bihar jokatuko du 13garren jardunaldiko partidua.
Jardunaldi benetan interesgarria izango da dauden partiduak ikusita. Batez ere Hernaniko Ohorezko Erregional mailako taldeak partidu garrantzitsua du aurrean. Bihar, 12:00etan, Zubipen, Eibar Urko liderraren bisita izango du.
Hernaniarrak bolada onean daude eta horri esker hirugarren kokatu dira, Eibar Urko liderra lau puntura dutela. 28 eta 24 puntu dituzte, hurrenez hurren, eta etxekoek irabazten badute puntu batera hurbilduko dira sailkapenean. Anaitasuna da bigarrena, puntu bakarrera, eta garaipenarekin, sailkapena estutuko litzateke.
Mundarrok atsedena edukiko du preferente mailan, baita Hernanik ere. Ez ordea beste talde batzuk.
Hernaniko neskak Beasainen ariko dira larunbatean
Hernaniko Euskal Ligako neskak garaipen ederra lortu zuten pasa den asteburuan eta larunbatean Beasainen jokatuko dute, 16:30etatik aurrera Goierri Gorri taldearen kontra Loinazeko futbol zelaian. Sei punturen aldea dago bi taldeen artean goierritarren alde. Hauek ere 13garren jardunaldiko partidua dute.
Ordu berean, 16:30etan, hau ere etzi larunbatean, Hernaniko Jubenil Nazionalak Zubipen jokatuko du Barakaldoren aurka. Garaipenaren beharra dute hernaniarrek azken aurrenak baitaude sailkapenean. 14garren jardunaldiko partidua da, lehen itzuliko azkenaurrena. Barakaldo arerio gogorra da.
Zarkumendegin, gaur eta bihar
Nahiz eta Mundarroko talde nagusiak ez jokatu Zarkumendegin egongo dira partiduak. Hasteko, gaur, 19:30etan Ohorezko Mailako jubenilek jokatuko dute Ekintzaren kontra eta bihar, 12:00etan, Lehen Erregional Mailakoek dute partidua Luberriren kontra.