Espainiar Konstituzioaren Eguna da abenduaren 6a, eta horren inguruan Sortu alderdi politikoak dio, Euskal Herriko biztanleek ez dutela ezer ospatzeko. «Espainiar konstituzioa Euskal Herrian inposatu zuten, eta ez du gure herriko biztanleria ordezkatzen, Espainian indarrean den legediaren ezarpenaren adierazlea da, ukazio eta inposaketa du oinarri, euskal herritarron eskubideak zapaltzen eta ukatzen ditu. Herri honen burujabetza eskubidea ukatzen duen konstituzioa da».
Idatzian Sortuk adierazi duenez, «gaur egun bizi dugun krisi politiko eta ekonomiko honetan, pertsonen eskubideak ez dira errespetatzen. Migranteak, emakumeak, gazteak, pentsiodunak, jendarte osoaren bizi baldintza duinak ez dira bermatzen. Etxebizitza eskubidea, lan duina, justizia soziala, ez dira bermatzen. Presoen eta senideen eskubideak ez dira errespetatzen. Euskaraz bizitzeko eskubidea ez da bermatzen».
Euskal Herriak libre eta demokratikoki bere etorkizun instituzionala, ekonomikoa, kulturala eta soziala erabakitzeko eskubide osoa duela dio Sortuk.
«Arrazoi hauengatik guztiengatik, Euskal Herriak independentzia behar du. Eta horretarako, Euskal Errepublika eraiki behar dugu. Euskal Errepublikak izan behar du euskal herritarren eskubideak bermatuko dituena, justizia sozialean oinarritutako Euskal Errepublika, emakumeen eskubide guztiak bermatuko dituena, etxebizitza eskubidea bermatuko duena, pobreziarekin bukatuko duena, pertsonen bizitza duina bermatuko duena, presoen eta familiarren eskubideak bermatuko dituena, euskararaz bizitzea bermatuko duena, klima aldaketari eta bere ondorioei modu integralean helduko diena...». Beraz dio, «bihar ez da ezer ospatzeko eguna, gure herriak duen erabakitzeko eskubidearen alde eta burujabetzaren alde lan egiteko eguna baizik».