Hernani Errotzenek antolatuta, datorren astean izango da Errotzen (h)astea. Bi zita jarri dituzte aurten: hilaren 10ean asteartean, Baskoniako Dukerriaren estatus politikoaz ariko da Iñaki Lopez de Luzuriaga, 19:30etan Biterin; eta 11n, Arantzazu, harriz herri dokumentala jarriko dute, ordu eta toki berean. Dokumentala euskeraz eta gaztelaniaz eskainiko da.
Baskonia Dukerriaren estatus politikoa (768-801) hitzaldia Iñaki Lopez de Luzuriaga itzultzaile eta Euskal Wikilarien Elkarteko batzordekideak emango du. Euskaldunak eta karolingiar iraultza: Akitania eta Baskonian barrena liburuan oinarritua hitzaldiaren sarrera hitzak ondorengoak izango dira: «Akitaniako Gerra amaitzear zela (767), euskaldunek atarian ikusi zuten karolingiar etsaia. Ataka horretan, Pepin eta Karlos erregeekin hitzarmenetara heldu ziren gerra saihesteko. 778an, ordea, indar karolingiarrak Baskonian barrena oldartu ziren, eta Orreagako Batailan galdu».
50 urte bete dira aurten apostoluak jarri zirela Arantzazun
Arantzazu harriz herri dokumentala eskainiko da asteazkenean, abenduaren 11n. Duela 50 urte, Arantzazuko basilika artearen eta arkitekturaren Euskal Herriko erreferentziazko leku bilakatu zuen Oteizaren 14 apostoluak bere lekuan jartzean. Izan ere, Jorge Oteizaren lanak 15 urte baino gehiago iraun zuen debekua jasan zuen. Urteurren hori dela eta, Nabarralde Fundazioak Arantzazuren inguruko dokumentala argitaratu du.
Aldundiaren, Laboral Kutxaren eta Oñatiko Udalaren laguntzari esker egindako dokumentala Hernanin bertan estreinatu zuten irailean Orona Ideon eta orain Biterira etorriko da.