Bigarrenez jarri du martxan, Berriak merkatari eta ostalarien elkarteak, Hernani-Bonoa kanpaina. Eta gaurtik abenduaren 10era bitarte (edo bukatu arte), 300 deskontu bono jarriko dituzte salgai, elkarteko ia 70 dendatan erabiltzeko.
Bonoak Berriak elkartearen lokalean (Andre kalea 30) eskuratu ahal izango dira, goizeko 09:00etatik 14:00etara, edo arratsaldeko 16:00etatik 18:00etara. Bono bakarra erosi ahal izango da, NAN bakoitzarekin; eta gehienez ere, bi NAN aurkeztu ditzake, pertsona bakoitzak.
%20ko deskontua, erosketetan
Bono horiekin, %20ko deskontua jasoko dute herritarrek, erosketak egiterakoan. Izan ere, 40 euroan erosiko dute bonoa, eta horrekin, 50 euro gastatu ahal izango dituzte, kanpainarekin bat egin duten komertzioetan. Gainera, Hernani Txartela daukatenek, 40 euro beharrean, 38 euro ordainduko dituzte.
Urtarrilaren 6ra arte erabili ahal izango dira bono horiek, mota guztietako ia 70 dendatan: elikadura, jantziak, oinetakoak, aisialdia eta kultura, kirolak, edergintza... Denda horiek, kanpainaren kartela izango dute eskaparatean.