Balentrietarako bikote ezin indartsuagoa osatu dute beti, Hernanik eta lokatzak; eta ez zuten urruti izan atzokoan ere, El Salvador indartsuaren kontra. Partidua bukatzeko lau minutu falta ziren arte mantendu zuten esperantza trikoloreek, Landareko zelai lokaztuan; baina ezin izan zuten azkenean: 5-17 nagusitu zen Valladolideko taldea, eta punturik gabe geratu ziren hernaniarrak.
El Salvadorren nagusitasuna espero zen hasieratik, eta hala izan zen; baina beste behin, hortzak erakutsi zizkion talde hernaniarrak, faboritoari. Ondo eutsi zien Valladolidekoen erasoei, eta 14garren minutuan Jorge Emanuel Garciak lortutako entsaioa izan zen alde bakarra markagailuan, ia atsedenaldira arte: 37an lortu zuen bigarrena, Martin Du Toitek (0-12). Baina borrokarako zegoen Hernani, eta atsedenetik bueltan, berehala gerturatu zen, Erik Goñiren entsaioarekin (5-12).
Hortik aurrera, aukera gutxi izan zituzten trikoloreek, baina esperantza bai, partidua berdintzeko, edo eskura zeukaten defentsako bonusa lortzeko behintzat. Lau minutu falta zirenean, ordea, erabakita utzi zuen partidua El Salvadorrek, hirugarren entsaioa gauzatuta (5-17). Lan haundia eginda ere, esku hutsik berriro.