Gaur bukatuko da, Hernaniko Xake Txapelketa; eta azkeneko partiden atarian, hiru jokalarik daukate aukera, aurtengo txapela janzteko: Evgeny Makarov, Miguel Xerpa eta Edu Sanz.
Arratsaldeko 16:00etan hasiko da zazpigarren jardunaldia, azkenekoa, Kixkal tabernan. Elkarren kontra ariko dira Makarov eta Xerpa, eta Udo Esnaola izango du aurrez aurre, Sanzek. Sailkapeneko buru da Makarov, 5,5 punturekin, eta puntu erdira bigarrena da Sanz, 5ekin. Xerpa, berriz, 4,5 punturekin dago, baina gaur irabazita, Makarov berdinduko luke sailkapenean. Eta horrek, aukera emango lioke Sanzi txapela janzteko, Esnaolari irabaziz gero.
Gainerakoek, ez daukate txapeldun izateko aukerarik. Laugarren postuan berdinduta daude Esnaola, Eneko Martiarena eta Ibon Ramos, lau punturekin. Elkarren kontra ariko dira Martiarena eta Ramos.
Hauek dira, gaur jokatuko diren beste sei partidak, postuen dantzarekin lehian: Iñaki Erdozio eta Jose Mari Berrotaran; Beñat Murua eta Javier Burgos; Maitane Otaolea eta Eli Agirre; Joseba Goikoetxea eta Joxe Ramon Altuna; Iñaki Arrieta eta Jose Gonzalez; eta Peru Dominguez eta Mertxe Egizurain.
Haurren Txapelketa, gaur
Azkeneko jardunaldiarekin batera, jokatuko da baita ere Haurren Xake Txapelketa Azkarra, Kixkal tabernan bertan, ordu berean hasita. 14 urtetik beherakoentzat izango da.
Eta bata zein bestea bukatu ondoren, 18:30ak aldera izango da sari banaketa. Saria jasoko dute helduen txapelketako bi onenek, Hernaniko aurrenekoak, aurreneko emakumezkoak, eta haurren txapelketa azkarreko bi onenek.