Hernaniko talde nagusia berriz ere bueltan da indarberrituta. Azaroaren 9an jokatu zuen azkenengo partidua eta hilabeteko azken egunean, gaur, 16:00etan SilverStorm El Salvador indartsuaren bisita izango du.
Bigarren partidua jarraian izango da etxean jokatuko dutena eta oraingoan ere Valladolideko talde bat izango dute aurrez aurre. Gainera, hau ere sailkapenean oso ongi kokatua dago, bigarren, sei partidu irabazi eta bi galdu dituelarik denboraldian zehar. Hernanik ordea ez du oraindik garaipena ezagutzen eta zortzi partiduak galdu ditu.
Ez da aurkari errazena lehenengo garaipena lortzeko, baina Polidorik zuzendutakoak saiatuko dira zaleei aurreneko lau puntuak eskaintzen. Beharra badago.
Hernani azkena dago sailkapenean hiru punturekin eta jardunaldi honetan arrisku haundia dago aurreko sailkatuarengandik bi garaipenetara geratzeko. Gero horri buelta ematea zaila izango da. Hala ere, aurkari zuzenek ez dituzte partidu xamurrak.
21 egun hauetan jokalariak errekuperatzeko balio izan du. Denboraldia aurrera joan ahala hobekuntza nabaritu da jokoan, baina puntuak falta dira. El Salvadorrek oso talde sendoa du eta 80 minutuetan eman beharko da maila altua irabazi nahi baldin bada.
Bigarren taldea bosgarren garaipenaren bila
Gauzak hobe doaz 23 urtez azpiko bigarren taldearentzat. 14:00etan jokatuko du, Landaren, Hernani Atletico San Sebastianek El Salvadorren kontra. Hala ere ez da erraza izango, hemen ere Valladolideko taldea bigarren baitago sailkatuta. Hernani zazpigarrena da eta aukera ona da goiko postuetara hurbiltzeko. Denboraldi eta esperientzi ezin hobea ari dira bizitzen taldeak.