Arte Gela berria inauguratzen hasi zuten astea asteartean, Urumea Herri Gunean, eta Amalia de la Matak tailerra eman zuen bertan, estreineko egunean. Collage Feminista osatzeko aukera izan zuten bertaratutakoek, horretarako egunkari, aldizkari eta kartel edo paper zaharrak erabilita.
Asteburuari begira, berriz, ekintza gehiago antolatu dira, gaur bertan hasita.
Tripa beteta sari bila, bingo musikatuan
Gaurkoan jantoki beganoa irekiko dute berriro. Iluntzeko 20:30etatik aurrera izango da bertan afaltzeko aukera: sarrerakoa, plater nagusia eta postrea; menu osoa 5 euroren truke dastatu ahal izango da.
Ondoren, bingo musikatua egingo da, jolas giroa luzatu eta ondo pasatzeko. Bertan, sariak irabazteko aukera ere izango dela aurreratu dute. Hain zuzen, irabazleak fanzinea, pegatina eta musika sorta eramango ditu etxera.
Bihar gehiago, dantzaldian
Segi egingo du egitarauak bihar ere. Dantzaldia antolatu dute, gaueko 21:00etatik 00:00ak arteko tarterako.
«Nahi dugun askatasunarekin mugitzeko espazioak behar ditugu»
Aurreratu dutenez, «estilo desberdinetako musikarekin gozatu eta aske dantzatzeko» antolatutako dantzaldia izango da. Besteak beste, reggaetoi, denbow, rap, kunbia, psytrance eta beste hainbat estilotako musika jarriko da.
Baina bereziki nabarmendu dute «nahi dugun askatasunarekin mugitzeko espazioak behar» direla, eta beraz, diote: «hemen ez duzu matxirulorik aurkituko!».
Era berean, dantzatu nahi ez duena ere gonbidatu dute bertaratzera, «lasai egoteko txokoa» ere egongo delako, «pikoteoa, fanzinea eta materiala» jarriko duten mahaian.