HERNANI UDALA
Asteartean bildu zen Hernaniko Udaleko Plenoa, ohiko deialdian; eta aho batez onartu zituzten gai gehienak. Horietako bat izan zen, Hiribus zerbitzuaren azterketa egiteko hitzarmena sinatzea, Gipuzkoako Garraio Agintaritzarekin: «Hiribusaren lizitazio berria egin behar da, eta interesgarria iruditu zaigu azterketa egitea, ikusteko aldaketarik egin behar den», azaldu zuen Koro Etxeberria zinegotziak. PSE-EEko Ricardo Crespok zoriondu egin zuen Udal Gobernua: «behin eta berriro eskatu dugu azterketa».
Aho batez onartu zituzten, baita ere, 2020rako taxien tarifak: %0,8koa izango da igoera.
Hori baino lehen, kontuhartzailearen txostenak dioenaren berri eman zuen Isa Sanchez ogasun zinegotziak. 2019ko udal aurrekontuaren exekuzio-maila eman zuen aditzera: «gastuen %68 dago baimenduta, eta sarreren %75». Orain Hernaniko Jaione Aristregik nabarmendu zuen, «soilik %25ekoa» dela inbertsioen exekuzioa: «oso kopuru kaxkarra da». Sanchezek erantzun zion, inbertsio batzuk eginda egon arren, fakturak ordaindu arte ez direla pasatzen exekutatuetara.
Atzeratu egin zuten, aldiz, bosgarren puntua, Zikuñagako papeleraren haunditzea baimentzeari buruzkoa, URAren txostena ez delako iritsi oraindik. EAJ-PNVko Andoni Amonarraizek proposatu zuen, ez itxoitea hurrengo plenora, eta txostena jasotzean ezohiko pleno bat egitea.
Ondoren, onartu zuten aldaketa egitea, Berriak merkatari eta ostalarien elkarteari ematen zaion zuzeneko dirulaguntzaren hitzarmenean: «aurten onartu dugu 17.000 eurotik 27.000 eurora igotzea dirulaguntza, baina teknikoki aldaketa bat egin beharra geneukan orain», azaldu zuen Isa Sanchezek. Aristregik salatu zuen, «esku batekin merkataritza txikiari lagundu, baina bestearekin Galarretan beste merkataritza gune haundi bat baimendu» egin duela Udal Gobernuak; eta Xabier Lertxundi alkateak eskatu zion hori esan aurretik informatzeko: «erabaki hori hartu aurretik, merkatariekin eta Berriakekin hitz egin genuen», adierazi zuen.
Indarkeria matxistaren kontra, udal hautetsiak
Plenoaren bukaeran, beste puntu bat txertatu zuten, azaroaren 25aren bueltako adierazpena irakurtzeko. Emakumezko udal hautetsiek hartu zuten hitza, eta gogoan izan zituzten indarkeria matxistagatik eraildako emakumeak; bereziki, Charo Roman De la Fuente hernaniarra, 2011n erail zutena. Plenoan ziren Romanen senideak ere.
Beltzez jantzita agertu ziren Plenora zinegotzi guztiak, eta minutu bateko isilunea gorde zuten bukaeran.