Dagoeneko banatu dituzte Gipuzkoako Bazkundeak eta Merkataritzako Bulego Teknikoek, 2019ko 10 bitxiak sariak; Gipuzkoako merkataritza enpresen sariak, hain justu. Probintziako hamar denda nabarmenenak saritu zituzten, eskualde bakoitzeko bat; eta Beterri-Buruntzakoa, Hernanira etorri da: Eukene jantzidenda izendatu dute, eskualdeko bitxia. Eskualde bakoitzeko merkatarien botoekin erabakitzen da zeini eman.
Eukene Rodrigok, dendaren jabeak, jaso zuen saria, joan den ostiralean egin zuten ekitaldian, Donostian, Gipuzkoako Bazkundearen egoitzan. «Oso oso pozik» azaldu da, izendapenarekin, eta ilusio berezia egin dio, eskualdeko guztien artean Eukene jantzidenda aukeratu izanak. Dagoeneko jarri ditu garaikurra eta diploma, dendako eskaparatean ikusgai.