Gipuzkoako hainbat herritan antolatu dituzte ekintzak, egun hauetan, Kurdistani elkartasuna erakusteko; eta horietako bat, Hernanin izango da, gaur bertan: zineforuma antolatu dute, arratsaldeko 18:00etan hasita, Biteri kultur etxean.
Horrela, jarriko dute Sara; jiyana min her ser bû (Sara; nire bizitza osoa borroka izan zen) filma, Sakine Cansiz iraultzaile feminista kurduaren bizitza kontatzen duena. 2013an erail zuten, Turkiako zerbitzu sekretuek. «Kurdistango Langileen Alderdiko sortzaileetako bat izan zen, eta Turkiako estatu faxistaren aurka erresistentzian altxa zen aurreneko emakumeetakoa», nabarmendu dute. Dérsim Zérevanek zuzendu du dokumentala, eta bertan, Sakine Cansizen ibilbidea eta izaera deskribatzen dute, haren lagun eta kideek. 2015ean grabatu zuten, eta 95 minutuko iraupena dauka.
Horren ondoren, beste dokumental bat jarriko dute, Turkiako inbasioaren ingurukoa. Eta bukatzeko, eztabaida gidatua egingo dute, ikusitako bi dokumentalei eta gaiari buruz.
Kontzentrazioa larunbatean, Anoetako estadioan
Kurdistani elkartasuna erakusteko ekintzek, abenduaren 7an izango dute azkeneko hitzordua, Durangon egingo dute manifestazio nazionalarekin.
Baina horren aurretik, beste zita bat ere jarri dute, Donostian. Kontzentrazioa egingo dute larunbat honetan, Anoetako estadioaren aurrean, arratsaldeko 17:30etan. Bertan salatuko dute armagintzaren industria.