Umorea izango da protagonista gaur, Biteri kultur etxean, Koxka elkartearen eskutik: bakarrizketa saioa antolatu du, arratsaldeko 19:00etan hasita, eta hiru bakarlari igoko dira taula gainera: Kike Parra hernaniarra, Telmo Irureta zumaiarra, eta Jexux Eizagirre, Hernanin bizi den zumaiarra.
Hiruen artean, umorerako gai bilakatuko dituzte gaurkoan, heriotza, oztopoak eta zahartzaroa. Telmo Irureta aktorea izango da taula gainean aurrenekoa. Lehenago ere hainbat bakarrizketa eskaini ditu Hernanin, eta bere emanaldi berriena eskainiko du gaurkoan: Cuando te mueras. Umore beltz zorrotza baliatuz, heriotzari buruz ariko da zumaiarra. Gaztelaniaz eskainiko du.
Kike Parrarena izango da bigarrena, Tetris izenekoa. Irureta bezala, gurpildun aulkian mugitzen da Parra, eta horrek egunerokoan eragiten dizkion oztopo zein egoera barregarri eta deserosoei buruz ariko da. Gaztelaniaz izango da hernaniarraren saioa ere.
Eta ekitaldiari itxiera emateko, zahartzaroa izango du hizpide Jexux Eizagirrek. Bere saioaren izenburuak, ematen du pistaren bat: Pitopausia. Euskeraz ariko da bera.
Joan den urtean, bakarrizketa ikastaroa eskaini zuen Telmo Iruretak Hernanin, Dobera Euskara Elkarteak antolatuta; eta partehartzaileetako bat izan zen Eizagirre. Ikastaroaren bukaeran, emanaldia ere eskaini zuten ikasle guztiek, Biterin.
Doakoa, eta zeinu hizkuntzako itzultzailearekin
Doakoa izango da gaurko bakarrizketa saioa, eta herritar guztiak gonbidatu ditu Koxkak, bertaratu eta ondo pasatzera. Gainera, nabarmendu du itzultzailea ere izango dela bertan, baita zeinu hizkuntzan ere.