Ez zen oso saio distiratsua izan atzo Oiartzungo Elorsoro kiroldegian jokatutako Gipuzkoako Bertso Txapelketako bigarren finalaurrekoa. Baina giroa ezinhobea izan zen; aretoa lepo, hernaniar ugari zegoen publikoaren artean.
Saioa Beñat Gaztelumendi añorgarrak irabazi zuen, eta beraz, Hernaniko Bertso Eskolako bigarrena da, finalerako postua lortu duena. Aurrenekoa Agin Laburuk lortu zuen. Hark 501 puntu egin zituen, eta Gaztelumendik, 506.
Asier Azpiroz zubietarra, berriz, laugarren izan zen atzo 463 punturekin, eta badauzka aukerak Ilunbera iristeko. Bigarren, Alaia Martin izan zen (493,5); hirugarren, Ane Labaka (472,5); bosgarren, Iñigo Mantzizidor (453); eta seigarren, Amaia Iturrioz (438).