Ezin berdinduagoa ari da izaten Binakako Txapelketa, aurreneko jardunaldietan. Eta hala erakutsi zuen osteguneko partiduak ere. Tanto bakarreko aldearekin erabaki zen, txapelketako hirugarren partidua: 40-39 nagusitu ziren Ansa II eta Ion, Matxin III eta Endikaren kontra.
Sailkapenerako puntu banaketak, ordea, honakoak utzi zituen: Ansak sei puntu jaso zituen, lau irabazteagatik eta bi aurrelarien artean tanto alde txikiena lortzeagatik; Matxinek alderantziz, bi puntu porrotarekin, baina lau aurrelari onena izateagatik; Ionek zortzi puntu jaso zituen, Endikak adina tanto baina akats askoz ere gutxiago eginda; eta lau puntu lortu zituen Endikak, bi emaitzarekin eta bi banakako balorazioan.
Ondo ekin dioten bi bikote, elkarren kontra gaur
Gaur bertan jokatuko dute berriro, Ansak eta Ionek; eta aurrean, garaipenarekin ekin dion beste bikote bat izango dute: Uterga eta Azpiroz. 16:00etan hasiko da jaialdia Galarretan, eta bigarren partidua izango da.
Aurrenekoan, berriz, Aritz Zubiri goizuetarrak jokatuko du. Urrutia IIrekin ariko da, Beñat eta Larrañagaren kontra.