Ostegunean aurkeztu zuten, CD Hernanik eta Hernaniko Udalak, sexu jazarpenaren eta erasoen prebentziorako protokoloa. Elkarlanean osatu dute, klubeko futbol sailak eta Udalak, «Zubipe eremu segurua izan dadin kirolari guztientzat, eta jendea futbolaz gozatzera etor dadin, besterik ez», nabarmendu zuen Martxelo Ezpondak, CD Hernaniko lehendakariak. Aurkezpen ekitaldian bertan sinatu zuten protokoloa.
Joan den denboraldian ikusi zuten horrelako tresna baten beharra, «hitzetatik ekintzetara» pasatzeko: neska kadeteen partidu batean, neska bat ari zen epaile lanetan; eta zenbait gurasoren irainak jasan behar izan zituen harmailetatik, neska zela eta epaile izateko gaitasunik ez zeukala esanez. Irainek partiduaren ondoren jarraitu zuten, beheko aldean, epailea negar eginarazteraino. Beste guraso batzuek eten zuten egoera, azkenean.
Gertaera horren ondorioz, Udalarekin harremanetan jarri zen CD Hernani, eta protokoloa osatzeko pausoa eman zuten, elkarlanean. «Hernani herri segurua eta atsegina izatea nahi dugu, tratu onetan oinarrituko dena», nabarmendu zuen Esti Aldeiturriaga kirol zinegotziak.
Hortik aurrera, «klubeko zuzendaritza, entrenatzaileak, langileak, jokalariak... jarri genituen lanean, eta elkarrekin adostu genituen oinarriak. Beharrezkoa eta garrantzitsua ikusten genuen, protokoloa osatzea, eta behin oinarriak adostuta, idaztea falta zen. Konpromiso batzuk hartu ditugu, eta aurrera eraman nahi ditugu», azaldu du Ezpondak.
«Ezin ditugu jasan, kirolean normalizatuta dauden jokabide eta irain horiek»
Prozesu honetan, Ainhoa Azurmendi kirol gaietako aholkulariaren laguntza izan dute: «oso garrantzitsua da hartu duten konpromisoa. Prozesua oso aberasgarria izan da, eta sorpresa atseginak hartu ditut nik, haien aldetik. Horrelako zerbait egitea garrantzitsua da, abusuak gertatzen direnean nola jokatu jakiteko. Ezin ditugu jasan, kirolean normalizatuta dauden jokabide eta irain horiek. Zelaia eremu seguruago bat bilakatu behar dugu, eta ez bakarrik Hernanin, Euskal Herri osoan baizik», azpimarratu zuen.
Xabier Iradik, CD Hernaniko lehendakariordeak, jarrera aktiboa izango dutela, «gure eremuan ematen diren sexu-jazarpen eta irainen kontra», eta biktimak babestuko dituztela. Baina era berean, azaldu zuen mezu hori helaraziko dietela, taldeko jokalarien gurasoei ere.
Aurreko denboraldiko kasu jakin horretan, nola jokatuko luketen azaldu zuen Aldeiturriagak: «Udaltzaingoari deituko genioke, eta beraiek eskumena izango lukete, erasotzaileak zelaitik kanporatzeko. Hortik aurrera, biktimarekin hitz egingo genuke, eta bere nahia errespetatuko litzateke, prozedura hasi edo ez, epaitegietara jotzeko».
Nabarmendu zuten, hala ere, ez dela partiduei soilik begirako protokolo bat, Zubipeko egunerokora bideratutakoa baizik. Horrela, taldean jokatzen duen mutil batek neska bat erasotu edo irainduko balu, adibidez, beharbada taldean sekula gehiago jokatzea debekatuko liokete.
Kontseilu bat sortuko da, kasu horiek aztertzeko
Aurreratu zuten, gainera, kontseilu bat sortuko dutela, horrelako kasuak aztertzeko, banan-banan. Eta kontseilu horrek erabakiko du, zer-nolako neurriak hartu behar diren.
Martxelo Ezpondak jakinarazi zuen, era berean, Gipuzkoako Futbol Federazioaren zuzendaritzan aurkeztu zuela protokoloa, talde guztien eskura egon dadin.
«Horrelako neurriak hartzeko eta protokolo bat adosteko, borondatea behar da, besterik ez», nabarmendu zuen Esti Aldeiturriagak, azkenik.