Hasiera bikaina eman diote denboraldiari, senior mailako bi boleibol talde hernaniarrek. Jokatutako lauak irabazi ditu mutilen taldean, Euskal Ligan; eta hirutik hiru nesken taldeak, Gipuzkoako Ligan.
Eta asteburu honetan, konpromiso gogorrak bezain interesgarriak dauzkate biek, sailkapenean haien pare dabiltzan taldeen kontra.
Neskak, etxean ariko dira gaur, Arantzazuko Ama liderraren kontra. Partidu bat gehiago jokatuta daude donostiarrak, eta guztiak irabazita haiek ere. Lidertza izango dute jokoan, beraz, 16:00etan kiroldegian.
Mutilek, berriz, etxetik kanpo jokatuko dute, asteburu honetan. Navarvoley talde indartsuaren kantxan ariko dira, Berriozarren, bihar 11:30etan hasita. Sailkapenean bigarren daude hernaniarrak, eta hirugarren nafarrak, lau partidutik bakarra galduta; eta porrota hori, Bera Bera liderraren kontra jaso zuten. Partidu egokia dute hernaniarrek, ikusteko eta erakusteko aurreneko postu horietan ibiltzeko gai direla.
Bestalde, Irekiera Torneoarekin jarraituko dute asteburuan, kadete nesken bi taldeek, eta infantil nesken beste biek. Kategoria bakoitzean, talde bat ariko da etxean.