Beldur Barik ikus-etzunezkoen lehiaketako sari banaketa nagusia bihar, larunbatean, egingo da Bilbon, Azkuna Zentroan, baina gaur bezperan, Hernaniko sariak banatuko dira, 18:30etan Biterin.
Sariak Hernanin, bi mailetan
Indarkeria sexistari aurre egiteko beldurrik eza sustatzen duen programa da Beldur Barik, Euskal Autonomia Erkidegoko erakundeek elkarlanean martxan jarritakoa, eta besteak beste, lehiaketa antolatzen dute, gazteek jarrera hori oinarri hartuta ikus-entzunezko lanak egin ditzaten. Euskadi mailan hiru kategoerietan banatuko dira sariak, baina Hernanin bi kategorietan antolatu da aurten Beldur Barik lehiaketa: 12-18 urte eta 19-26 urte.
Hernanin, Udalak, Berdintasun Kontseiluak eta Sailak, Gaztelekuak eta herriko hainbat eragile feministek bultzatuta, sariketa propioa ere antolatu da azken lau urteetan. Horrela, biharko ekitaldian, gazte hernaniarrek aurkeztu dituzten bideoak ikusi ahal izango dira, eta ondoren, Hernaniko sariak banatuko dira: 150 euroko sari bana egindako bideo onenei.
Topaketa bihar, Bilbon
Sari banaketa nagusia berriz, bihar egingo da Bilbon Azkuna Zentroa Alhondigan. Arratsaldeko 16:30etan hasiko da, 17:00etan tailerrak hasiko dira, 19:00etan photocall-a, 19:30etan lunch-a, 20:00etan banatuko dira sariak eta 21:00etan La Basu-ren kontzertua egongo da 21:30ak arte. Orduan amaituko da topaketa.