Giza eskubideen defendatzaileen Herri Babesarearen aurreneko foro ibiltariak Hernanin egingo du gaur geldialdia. Herriz herri dabil.
Parte-hartzaileek hizpide izango dituzte egun hauetan, lurraren eta ingurumenaren defentsa, elikadura burujabetza, emakumeen eta LGTBIQ+ komunitatearen eskubideak eta bakerako eskubideak. Kolonbia, Guatemala, Honduras, Mexiko, Palestina eta Saharako ordezkariek hartuko dute parte.
Hernanin gaur, 3 ordezkari
Donostian eta Ean izan ziren atzo, giza eskubideen defendatzaile hauek, eta gaur Hernanin izango dira batzuk, eta Errenterian, besteak.
Hernanira datozenak izango dira Hondurasko Arcoíris LGBT elkartea, Mexikoko Oaxaca Kontsorzioa eta Palestinako UPWCko ordezkaria. Udalak harrera instituzionala egingo die arratsaldeko 17:00etan, eta ondoren, mahai-inguru irekia egingo da Biterin, 18:30etan hasita. Bertan ariko dira Hondurasko Gay, Lesbiana, Trans eta Bisexualen egoeraz eta haien eskubideen defentsaz, Oaxaca Partzuergo feministak egiten duen lanaz eta Palestinako lurralde okupatuetan giza eskubideak defendatzen dituzten emakumeen inguruan.
Gaur Errenterian izango diren ordezkariak, bestalde, Guatemala, Kolonbia eta Saharakoak izango dira.
Beste 4 herritan, etzira arte
Herri Babesarea Agurain, Ea, Durango, Zornotza, Donostia, Errenteria, Irun eta Hernanik osatzen dute, eta horregatik, foro ibiltaria herri horietan barrena ibiliko da ostiralera arte.