Pasa den astean eman zieten hasiera Jardunaldi Antierrepresiboei, Urumea Herri Gunean. Bigarren hitzaldia, hala ere, atzeratu egin zen, Euskal Tsunamiaren deialdia zela-eta. Hori horrela, atzeratutako hitzaldi hori gaur egingo da. Askapeneko Izaskun Goienetxe ariko da 18:30etan, Kataluniaren inguruan; Errepresioa Herrialde Katalanetan: Procés-etik haratago.
Hau ez da aste honetako hitzordu bakarra izango, hala ere. Jardunaldi Antierrepresiboen bigarren atala ere antolatu dute, eta ostiralean jarri dute hitzordua. Kasu honetan, Txile izango da hizpide.
Txileren inguruko ezagutza partekatzen, ostiralean
Bigarren atal honetan desberdina izango da gaia lantzeko modua. Txileko altxamenduak eta erresistentziak aztertzeko informazio elkarbanaketa saioa da antolatu dutena ostiralerako, Ez dira 30$, 30 urte dira izenburupean.
Hitzordua 18:00etan jarri dute ostiralean. «Txileko estatuaren aldetik gauzatzen ari den golpe errepresiboaz eta herriaren erresistentzietaz hitz egingo dugu», azaldu dute antolatzaileek. «1973ko estatu kolpea, 1980an sortu eta gaur egun indarrean dagoen konstituzioa, urrian hasi ziren altxamenduak, konstituzio berri baten eskariak eta indarkeria polizialaz arituko gara, besteak beste».
Hori guztia aztertzeko modua izango da desberdina. «Informazio elkarbanketa saioa izango da. Partaideok bideoak, artikuluak, argazkiak, hausnarketa ezberdinak ekarriko ditugu, denon artean gaiari buruz informatu eta eztabaidatzeko». Dena den, azpimarratu dute «ez dela beharrezkoa ezer ekartzea parte hartzeko, entzutea parte hartzea» dela, alegia. «Sortu ditzagun informazio gune autonomoak».