Etxeko zaleen aurrean jarriko da martxan bihar, Hernaniko talde barneratzailea. Landaren jokatuko du, Bultza Ligako estreinako partidua, bihar eguerdiko 12:00etan hasita. Aurrean Getxo talde bizkaitarra izango dute, trikoloreek.
Orain hiru urte sortu zuten Bultza Liga, Euskal Herri mailan, eta proiektu aitzindaria izan zen, kirol barneratzailean. Aurten, lau taldek osatuko dute Bultza Liga: Hernani eta Getxorekin batera, ariko dira Gaztedi eta Uni Bilbao ere. Lau taldeek egin dute posible lehiaketa hau jokatzea, eta lauak dira, aldi berean, proiektuaren bultzatzaile.
Bultza Ligaren helburua da, aniztasun funtzionala duten pertsonen «erabateko inklusioa» gizartean, horretarako «errugbiaren balioak» aprobetxatuz. Horregatik, sortu dute «liga partehartzailea eta mistoa, mugak gaindituko dituena, eta talde lana, konpromisoa eta errespetua sustatu», azaldu dute. Hori horrela, nahi duten guztiak daude gonbidatuta, haiekin jokatu eta parte hartzera.
Biharko partiduaren ondoren, gainera, Ipintza sagardotegian egingo dute hirugarren denbora, partehartzaileek.